राज्यात दहा हजार जनावरांना लम्पीची लागण लसीकरण करून घेण्याचे पशुसंवर्धन विभागाचे आवाहन

पुणे, ता. १४ ः राज्यात लम्पी या त्वचारोगाचा प्रादुर्भाव नियंत्रणात येत असून, आतापर्यंत बाधित झालेल्या १० हजार जनावरांपैकी ६ हजार ६१८ जनावरे बरी झाली आहेत, तर ९३ टक्क्यांहून अधिक गोवंशीय पशुधनाचे लसीकरण पूर्ण झाले आहे. प्रादुर्भाव असलेल्या भागात जनावरांचे लसीकरण करून घ्यावे, असे आवाहन पशुसंवर्धन विभागातर्फे करण्यात आले आहे.
लम्पी हा त्वचारोग हा गोवंशीय वर्गात होणारा विषाणूजन्य रोग आहे. त्याचा प्रादुर्भाव प्रामुख्याने गाई, बैल आणि वासरांमध्ये आढळून येतो. लम्पीसाठी कारणीभूत असणारे कॅप्री पॉक्स विषाणू हे गोट पॉक्स (शेळ्यांतील देवी) आणि शिप पॉक्स (मेंढ्यातील देवी) या विषाणूच्या समूहातील विषाणू आहेत.
राज्यात एकूण गोवंशीय पशुधनाच्या तुलनेत लम्पी त्वचारोगाचा प्रादुर्भाव कमी होत आहे. प्रादुर्भावग्रस्त भागात उपचार, कीटक नियंत्रण व जनजागृती मोहीम सुरू असल्याने पशुपालकांनी घाबरू नये. मात्र, जनावरांचे लसीकरण करून घ्यावे आणि पशुवैद्यकीय अधिकाऱ्यांच्या सूचनांचे पालन करावे,’’ असे आवाहन पशुसंवर्धन, दुग्धव्यवसाय विकास व मत्स्य व्यवसाय विभागाचे सचिव डॉ. रामास्वामी एन यांनी केले आहे. ते म्हणाले, ‘‘लम्पीने राज्यातील ९ हजार ८२० पशुधन बाधित असून उपाययोजना प्रभावीपणे राबविल्या जात आहेत.’’
पशुसंवर्धन आयुक्त डॉ. प्रवीणकुमार देवरे म्हणाले, ‘‘पशुसंवर्धन विभागाने या रोग प्रादुर्भावाचा साथरोग विषयक अभ्यास करून रोग प्रतिबंधक लसीकरणाचा समावेश मॉन्सून पूर्व लसीकरण कार्यक्रमामध्ये केला आहे. यासाठी लस मात्रा व आनुषंगिक साहित्याचा पुरवठा पावसाळा सुरू होण्यापूर्वी करण्यात आला आहे. लम्पी त्वचारोगाबाबत पशुपालक तसेच पशुवैद्यकीय अधिकाऱ्यांना प्रशिक्षण देण्यात आले आहे.’’

दरवर्षी प्रतिबंधात्मक लसीकरण होणार...
लम्पीवर नियंत्रण आणण्यासाठी लम्पी त्वचारोग प्रतिबंधात्मक लस निर्मितीचे तंत्रज्ञान भारतीय कृषी अनुसंधान परिषदेच्या अॅग्रीइन्नोवेट इंडिया या कंपनीकडून उपलब्ध करून घेण्यात आले आहे. पुण्यातील पशुवैद्यकीय जैव पदार्थ निर्मिती संस्था व्यावसायिक तत्त्वावर लवकरच लसनिर्मिती करणार आहे. लम्पी चर्म रोगावरील लस उत्पादनामध्ये राज्य स्वयंपूर्ण होणार असून, राज्यातील सर्व गोवर्गीय पशुधनास दरवर्षी प्रतिबंधात्मक लसीकरण करण्यात येणार आहे, अशी माहिती डॉ. प्रवीणकुमार देवरे यांनी दिली.