सूर्यघर योजनेचा १९ हजार ग्राहकांना लाभ जिल्ह्यातील स्थिती ः स्वातंत्र्यदिन ‘सौरग्राम दिन’ म्हणून साजरा होणार

पुणे, ता. १४ : पुणे जिल्ह्यातील १९ हजार १९५ वीज ग्राहकांनी ‘पंतप्रधान सूर्यघर-मोफत वीज योजने’चा लाभ घेतला आहे. दरम्यान, ही योजना प्रत्येक नागरिकांपर्यंत पोहोचविण्यासाठी स्वातंत्र्यदिन हा ‘सौरग्राम दिन’ म्हणून साजरा करण्याचे महावितरणने ठरविले आहे. या दिवशी महावितरणचे अभियंते-कर्मचारी प्रत्येक गावात ग्रामसभा व विविध कार्यक्रम घेऊन वीजग्राहकांना या योजनेत सहभागी होण्यासाठी प्रोत्साहित करणार आहेत.
प्रत्येक नागरिकाला विजेच्या बाबतीत स्वावलंबी बनविण्यासाठी केंद्र सरकारने ‘पंतप्रधान सूर्यघर- मोफत वीज योजना’ सुरु केली आहे. स्वत:च्या घराच्या छतावर वीज तयार करून तिचा वापर करणे, हा त्यामागील उद्देश आहे. या योजनेच्या अनुदानासाठी केंद्राने ७५ हजार कोटींची तरतूद केली आहे. राज्यात महावितरणने १००० मेगावॅट वीज क्षमतेचा टप्पा ओलांडला आहे. पुणे जिल्ह्यात १९ हजार १९५ ग्राहकांनी छतावर सौरप्रकल्प साकारले आहेत. त्याची स्थापित क्षमता ८९ मेगावॅट इतकी आहे.
छतावर सौर ऊर्जा निर्मिती प्रकल्प बसविण्यासाठी केंद्र सरकारकडून ग्राहकांना थेट अनुदान मिळते. एक किलोवॅट क्षमतेच्या प्रकल्पाला तीस हजार रुपये, दोन किलोवॅटला साठ हजार रुपये तर तीन किलोवॅटला ७८ हजार रुपये अनुदान मिळते. गृहनिर्माण संस्थांनाही पाचशे किलोवॅटपर्यंत प्रती किलोवॅट १८ हजार रुपये अनुदान मिळते. छतावर बसविलेल्या सौर ऊर्जानिर्मिती प्रकल्पातून पुढे २५ वर्षे वीजनिर्मिती होते. त्यामुळे ग्राहकाची घरगुती गरज पूर्ण होते व अतिरिक्त वीज महावितरणला विकता येते.
ही योजना घरांघरात पोहोचविण्यासाठी स्वातंत्र्यदिनी ग्रामसभा, रॅली, रोड शो आयोजित करून सूर्यघर योजनेचे प्रसिद्धिपत्रके वाटून ग्राहकांना त्याचे महत्त्व पटवून देण्याचे काम केले जाणार आहे. पुणे शहरातील गृहनिर्माण संस्थांमध्येही कार्यक्रम आयोजित करून सूर्यघर योजनेची माहिती दिली जात असून, अनेक गृहनिर्माण संस्थांमध्ये महावितरणने मोठ्या प्रमाणात मेळावे देखील घेतले असल्याचे महावितरणतर्फे सांगण्यात आले.
------------