‘एमपीएससी’ आणि ‘नेट’ परीक्षा एकाच दिवशी

पुणे, ता. १६ : महाराष्ट्र लोकसेवा आयोगामार्फत (एमपीएससी) घेण्यात येणारी ‘महाराष्ट्र गट-क सेवा संयुक्त पूर्व परीक्षा २०२५’ आणि ‘नॅशनल टेस्टिंग एजन्सी’द्वारे (एनटीए) घेण्यात येणारी यूजीसी-नेट डिसेंबर २०२५’ परीक्षा एकाच दिवशी आल्याने विद्यार्थ्यांमध्ये संभ्रम निर्माण झाला आहे. दोन्ही परीक्षा ४ जानेवारी २०२६ रोजी असल्याने नेमकी कोणती परीक्षा द्यायची, असा प्रश्न विद्यार्थ्यांना पडला आहे.

आयोगाच्या वेळापत्रकानुसार ‘महाराष्ट्र गट-क सेवा संयुक्त पूर्व परीक्षा २०२५’ ३० नोव्हेंबर रोजी घेण्यात येणार होती. आयोगाचे वेळापत्रक प्रसिद्ध झाल्यानंतर संघ लोकसेवा आयोगाकडून विविध पदांसाठी जाहिरात प्रसिद्ध करण्यात आली. या परीक्षादेखील ३० नोव्हेंबर रोजी होणार असल्याने आयोगास उपकेंद्रे मिळण्यास येणाऱ्या अडचणी विचारात घेता, ही परीक्षा ४ जानेवारी २०२६ या सुधारित तारखेस घेण्यात येणार आहे, तर ‘एनटीए’तर्फे नुकतेच यूजीसी-नेट डिसेंबर २०२५’ परीक्षेसंदर्भातील परिपत्रक प्रसिद्ध करण्यात आले आहे. या परिपत्रकानुसार, ही परीक्षा ३१ डिसेंबर ते ७ जानेवारी दरम्यान देशभरातील विविध केंद्रांवर घेण्यात येणार आहे. त्यामुळे पुन्हा एकदा दोन परीक्षा एकाच दिवशी येत असल्याचे विद्यार्थ्यांनी नाराजी व्यक्त केली आहे.

यूजीसी-नेट’ परीक्षा देऊन ज्युनिअर रिसर्च फेलोशिप (जीआरएफ) मिळविणे किंवा प्राध्यापक होण्यासाठीही विद्यार्थी प्रयत्नशील असतात. त्यातच यूजीसी -नेट’चा पहिला पेपर आणि आयोगाच्या परीक्षेसाठी करावी लागणारी तयारी एकसारखीच असल्याने या दोन्ही परीक्षांची एकदमच तयारी करण्याकडे विद्यार्थ्यांचा कल असतो, परंतु यंदा या दोन्ही परीक्षा एकाच दिवशी होणार असल्याने विद्यार्थ्यांचे नुकसान होणार आहे.

याबाबत विद्यार्थ्यांशी संवाद साधला असता नाव प्रसिद्ध न करण्याच्या अटीवर त्यांनी सांगितले की, ‘आयोगाच्या वेळापत्रकात बदल झाल्यानंतर आम्ही ४ जानेवारीला होणाऱ्या ‘महाराष्ट्र गट-क सेवा संयुक्त पूर्व परीक्षा २०२५’ परीक्षेच्या तयारीला लागलो, पण आता अचानक यूजीसी-नेट’ची परीक्षाही याच दिवशी जाहीर झाली आहे. गेल्या अनेक महिन्यांपासून मी ‘गट-क’ सेवेतील नोकरी आणि ‘नेट’द्वारे प्राध्यापक होण्याची संधी, अशा दोन्ही संधीसाठी तयारी करत होतो. मात्र, आता कोणत्यातरी एका परीक्षेला मुकावे लागणार आहे.’

‘प्रस्तुत परीक्षेच्या आयोजनाच्या दिवशी अन्य संस्थेची परीक्षा असल्यास उमेदवारास कोणती परीक्षा द्यावयाची आहे; याबाबतचा निर्णय उमेदवाराने स्वतः घेणे आवश्यक राहील,’ असे आयोगाने त्यांच्या परिपत्रकात नमूद केले आहे.

-------------------
दोन्ही परीक्षा एकाच दिवशी आल्यामुळे विद्यार्थी गोंधळून गेले आहेत. एकतर परीक्षा वेळेवर होत नाहीत. वेळापत्रक जाहीर झाले तर दोन दोन परीक्षा एकत्र येत आहेत. त्यामुळे अनेक विद्यार्थी एका परीक्षेला मुकण्याची शक्यता निर्माण झाली आहे.
- महेश घरबुडे, अध्यक्ष, स्पर्धा परीक्षा विद्यार्थी असोसिएशन
-------------------
या दोन्ही परीक्षा अत्यंत महत्त्वाच्या आहेत. मात्र, आता आम्हाला कोणत्याही एका परीक्षेची निवड करावी लागणार, ही फार अन्यायकारक बाब आहे. प्रशासनाने विद्यार्थ्यांचा विचार करून तारखा बदलायला हव्यात.
- एक विद्यार्थी