दस्तनोंदणी होणार आरामदायी

सकाळ वृत्तसेवा
पुणे, ता. १४ : दस्त नोंदणीसाठी आला तर बसण्यासाठी गुबगुबीत सोफासेट, वातानुकूलित कार्यालय, स्वच्छतागृहाची सुविधा अन् नोंदणीला वेळ लागणार असल्यास चहा-कॉफीही... अशा सर्व सुविधा मिळाल्या तर तुम्हाला कसे वाटेल?. अशा प्रकारे खासगी संस्थांच्या माध्यमातून दस्तनोंदणी कार्यालय उभारण्याचा निर्णय नोंदणी व मुद्रांक शुल्क विभागाने घेतला आहे. मात्र या सर्व सुविधांसाठी दस्तामागे वेगळे शुल्कही भरावे लागणार आहे.

नोंदणी व मुद्रांक शुल्क विभागाने राज्यात तब्बल ६० खासगी दस्तनोंदणी कार्यालये सुरू करण्याचे ठरविले आहे. अशा कार्यालयांसाठी निविदा काढल्या असून सहा महिन्यांत पहिल्या टप्प्यात पुणे-मुंबईसारख्या मोठ्या शहरांत ३० कार्यालये सुरू करण्यात येणार आहेत. दुसऱ्या टप्प्यात आगामी दीड वर्षात प्रत्येक जिल्ह्याचे मुख्यालयात एक असे ३० कार्यालये सुरू करण्यात येणार आहेत. त्यासाठी खासगी संस्थांची मदत घेतली जाणार आहे. पासपोर्ट कार्यालयात ज्या पद्धतीने सुविधा दिल्या जातात, त्याचधर्तीवर हा प्रयोग करण्यात येणार आहे.

काय सुविधा मिळणार
- नागरिकांना विविध सुविधा देताना अतिरिक्त सेवाशुल्क आकारणार
- हे शुल्क जास्तीत जास्त सहा हजार रुपये असणार
- कमीतकमी दर आकारणाऱ्या संस्थेला हे काम देणार
- निविदा भरण्यासाठी २५ ऑक्टोबरची मुदत
- नोव्हेंबरमध्ये निविदा उघडून आवश्यक ती कार्यवाही करणार
- नोंदणीसाठी दुय्यम निबंधक व कारकून नेमणार, त्यांचे वेतन सरकार देणार
- अन्य कर्मचारी खासगी संस्था नेमणार

दस्तनोंदणीसाठी येणाऱ्यांना सर्व सोयीसुविधा पुरविणे, हा या मागील उद्देश आहे. त्यासाठी जास्तीत जास्त सहा हजार रुपये आकारण्याची मुभा दिली आहे. त्यापेक्षा कमी दराची निविदा स्वीकारण्यात येईल. निविदा प्रक्रिया पूर्ण झाल्यानंतर सहा महिन्यांत पहिल्या टप्प्यातील ३० कार्यालये सुरू करण्यात येतील.
- अभयसिंह मोहिते,
नोंदणी उपमहानिरिक्षक, पुणे