पर्यावरण परवानगीसाठी सल्लागाराची नियुक्ती

पुणे, ता. १६ : बालभारती पौड फाटा रस्ता करायचा असेल तर त्याआधी पर्यावरण विभागाची परवानगी घ्या, असे आदेश सर्वोच्च न्यायालयाने महापालिकेला दिले आहेत. त्यानुसार त्याची कार्यवाही करण्यासाठी प्रशासनाकडून सल्लागार नियुक्त केला जाणार आहे.

वेताळ टेकडीवरून आयएलएस विधी महाविद्यालयाच्या पाठीमागून बालभारती ते पौड फाटा या दरम्यान रस्ता प्रस्तावित विकास आराखड्यात केला आहे. हा रस्ता टेकडीवरून जाणार असल्याचे पर्यावरणाची हानी होणार आहे. जैवविविधतेला धक्का लागणार असल्याने या प्रकल्पास पुण्यातील पर्यावरणप्रेमी नागरिकांनी विरोध केला होता. तरीही महापालिकेने रस्ता करण्यासाठी निविदा प्रक्रिया सुरू करण्याचा प्रयत्न केला होता. त्यामुळे नागरिकांनी याविरोधात उच्च न्यायालयात याचिका दाखल केली होती. तेथे महापालिकेच्या बाजूने निकाल देत पर्यावरण परवानगी घेण्याचे आदेश न्यायालयाने दिले होते. त्यानंतर पर्यावरणप्रेमी डॉ. सुषमा दाते आणि आयएलएस विधी महाविद्यालयाने सर्वोच्च न्यायालयात याचिका दाखल केली होती. त्यावर बुधवारी (ता. १५) सुनावणी झाली. त्यामध्ये याचिका निकाली काढण्यात आली, तसेच महापालिकेला राज्य शासनाच्या पर्यावरण विभागाची परवानगी घेऊन काम करावे, असे आदेश दिले आहेत. त्यानुसार ही परवानगी मिळविण्यासाठी महापालिकेकडून सल्लागार नियुक्त केला जाणार आहे. प्रस्ताव दाखल झाल्यानंतर दोन महिन्यांत परवानगी मिळू शकेल, असे शहर अभियंता प्रशांत वाघमारे यांनी सांगितले.

अधिकारी करणार पाहणी
बालभारती ते पौड फाटा या प्रस्तावित रस्त्याच्या जागेची पाहणी महापालिकेचे अधिकारी उद्या (शुक्रवारी) करणार आहेत. यापूर्वीही अधिकाऱ्यांनी रस्त्याची पाहणी केली होती, पण आता निकाल आल्यानंतर तेथील नेमकी स्थिती काय आहे, हे जाणून घेण्यासाठी ही पाहणी केली जाणार आहे. यासंदर्भात वाघमारे यांनी पथ विभागाच्या अधिकाऱ्यांना सूचना केली आहे.