मकोका गुन्ह्यातील फरार आरोपी करण कुंभार गजाआड

पुणे, ता. १६ : मागील सहा महिन्यांपासून फरारी असलेला कुख्यात आरोपी करण खंडेराव कुंभार (वय २४, रा. इराणी मार्केट, गाडीतळ, येरवडा) याला येरवडा पोलिसांनी अटक केली.
करण कुंभार याच्याविरुद्ध येरवडा पोलिस ठाण्यात आर्म अॅक्ट आणि महाराष्ट्र संघटित गुन्हेगारी नियंत्रण (मकोका) कायद्यान्वये गुन्हा दाखल होता. गुन्हा दाखल झाल्यानंतर तो फरारी झाला होता. तपास पथक सतत त्याच्या हालचालींवर लक्ष ठेवून होते. आरोपी कुंभार ताडीगुत्ता, येरवडा परिसरात येणार असल्याची माहिती पोलिस अंमलदार नटराज सुतार आणि अक्षय शिंदे यांना मिळाली. त्यानुसार पोलिस उपनिरीक्षक प्रदीप सुर्वे यांच्या पथकाने सापळा रचून त्याला अटक केली. ही कारवाई अतिरिक्त पोलिस आयुक्त मनोज पाटील, पोलिस उपायुक्त सोमय मुंडे, सहाय्यक आयुक्त प्रांजली सोनवणे यांच्या मार्गदर्शनाखाली वरिष्ठ पोलिस निरीक्षक रवींद्र शेळके यांच्या पथकाने केली.