‘फेम’च्या आर्टवर्क स्पर्धेत जळगावच्या पालवी जैन प्रथम

पुणे, ता. १८ : फेडरेशन ऑफ ॲडव्हर्टायझिंग अँड मार्केटिंग एंटरप्रेनियर्स(फेम)तर्फे राष्ट्रीय जाहिरात दिनानिमित्त आयोजित राज्यस्तरीय आर्ट वर्क स्पर्धेचे निकाल नुकतेच जाहीर करण्यात आले. त्यात जळगावच्या पालवी जैन प्रथम आल्या असून, द्वितीय क्रमांक रत्नागिरीच्या शर्वरी सावंत यांचा आला आहे. नाशिकचे मीडिया हाउस आणि कोल्हापूरचे श्रीरंग लोहार यांचा संयुक्त तृतीय क्रमांक आला आहे.
‘फेम’चे अध्यक्ष रवी पवार यांनी सर्व विजेत्यांचे अभिनंदन करताना सांगितले की, ‘‘अशा स्पर्धांमुळे माध्यम क्षेत्रातील सर्जनशील कलागुणांना योग्य व्यासपीठ मिळते आणि नव्या कल्पनांना प्रोत्साहन मिळते.’’ या स्पर्धेला राज्यभरातील विविध जिल्ह्यांतील आर्टिस्ट, जाहिरात संस्था तसेच कॉलेजमधील विद्यार्थी यांनी उत्स्फूर्त प्रतिसाद दिला. अनेक जिल्ह्यांमधून आलेल्या उत्कृष्ट कलाकृतींमधून विजेते निश्‍चित करण्यात आले आहेत.
स्पर्धेची यंदाची संकल्पना ‘स्वदेशी खरेदी करा- आत्मनिर्भर भारत घडवा’ ही होती. राष्ट्रीय जाहिरात दिनानिमित्त निश्‍चित करण्यात आलेल्या या संकल्पनेनुसार सहभागींकडून ‘स्वदेशी खरेदी, बाय इंडियन, बिल्ड नेशन’ या विषयावर आकर्षक आणि प्रभावी आर्ट वर्क मागविण्यात आले होते. ते सर्व आर्ट वर्क डिजिटल स्वरूपात सादर केले होते. श्रीकांत नागरे (नाशिक), विजय क्षीरसागर (सोलापूर) व बाळकृष्ण जोशी (कोल्हापूर) या कलाकारांच्या समितीने मूल्यांकन करून विजेते घोषित केले. स्पर्धेतील विजेत्यांना अनुक्रमे ११ हजार, ५ हजार आणि ३ हजार रुपयांची पारितोषिके आणि सन्मानपत्रे देण्यात येणार आहेत.