सेवेतच दिसतो विठ्‌ठल!

पुणे, ता. २१ : ‘‘वारकरी उन्हा-तान्हात सलग १५ ते २० दिवस चालत पंढरपूरला जातात. त्‍याचदरम्‍यान त्‍यांचे केस वाढतात, दाढी वाढते, ते कमी करायला त्‍यांना वेळही मिळत नाही. म्‍हणून या वारकऱ्यांची दाढी-कटिंग आम्‍ही अनेक वर्षांपासून करत आहोत. त्‍यांच्‍या सेवेतच आम्‍हाला विठ्‌ठल भेटतो. आम्‍ही माणसांमध्‍येच देव पाहतो,’’ अशी भावना आर. के. बहुउद्देशीय संस्‍थेच्‍या सचिव भाग्‍यश्री साळुंके यांनी व्‍यक्‍त केली.
साळुंके यांच्‍यासह संतोष सुरवसे व इतर सहकारी दरवर्षी पुण्‍यात वारकरी आल्‍यानंतर त्‍यांची दाढी, केस कापणे व त्‍यांची मालिश करणे अशा प्रकारच्‍या मोफत सेवा देतात. दरवर्षी पालखी मुक्‍कामाच्‍या वेळी हजार ते दीड हजार वारकऱ्यांना ते व त्‍यांच्‍या संस्‍थेचे कार्यकर्ते सेवा देतात. साळुंके म्‍हणाल्‍या, ‘‘वारकरी आमच्‍यासाठी पांडूरंगापेक्षा कमी नाहीत. त्‍यांच्‍या सेवेत आम्‍हाला एक वेगळेच समाधान लाभते. त्‍याचबरोबर आम्‍ही दरवर्षी त्‍यांना वैद्यकीय उपचार, अन्‍नदानही करतो.’’
गेल्‍या ४० वर्षांपासून वारकऱ्यांची याच प्रकारची सेवा करणारे साखळीपीर तालीम राष्‍ट्रीय मारुती मंदिराचे अध्‍यक्ष रवींद्र माळवदकर म्‍हणाले, ‘‘आम्‍ही दरवर्षी नाना पेठेतील साखळीपीर तालीम येथे दोन ते अडीच हजार वारकऱ्यांची दाढी, केस कापणे, त्‍याचबरोबर अन्‍नदान, मसाज, चप्‍पल दुरुस्ती ही सेवा मोफत देतो. इतकेच नव्‍हे तर महाराष्ट्रीयन जेवणही त्यांना देतो. त्‍याचबरोबर शिवमहोत्‍सव समितीकडूनही वारकऱ्यांची सेवा करण्‍यात येते. या समितीमध्‍ये ७० सामाजिक संघटना आहेत. या सेवेतून आम्‍हाला पांडुरंगाच्या सेवेचे पुण्‍य लाभते’’