आधुनिक तंत्रज्ञानाच्या वापरातून अंधारातही भविष्य घडविणे शक्य

पुणे, ता. २५ : ‘‘आधुनिक तंत्रज्ञानाच्या वापरातून अंधारातही भविष्य घडविता येते. कृत्रिम बुद्धिमत्तेचा वापर केल्यास जीवनात अंधार ही अडचण न राहता शारीरिक अक्षमतांना क्षमतांमध्ये रूपांतरित करता येऊ शकते,’’ असे मत ज्येष्ठ शास्त्रज्ञ डॉ. रघुनाथ माशेलकर यांनी व्यक्त केले.
डॉ. दीपक शिकारपूर लिखित ‌‘आर्टिफिशिअल इंटेलिजन्स २०२५++‌’ या ब्रेल लिपीतील पुस्तकाचे प्रकाशन डॉ. माशेलकर यांच्या हस्ते झाले, त्या वेळी ते बोलत होते. याप्रसंगी नॅशनल फेडरेशन ऑफ ब्लाइंडच्या प्रवक्त्या सकिना बेदी, फिडेल सॉफ्टच्या व्यवस्थापकीय संचालिका प्राची कुलकर्णी, जागृती स्कूल फॉर ब्लाइंडच्या व्यवस्थापक सविता गायकवाड, कौशल्य विकास मार्गदर्शक ऋजुता भागवत आदी उपस्थित होते. डॉ. शिकारपूर यांचे हे मूळ पुस्तक दिलीपराज प्रकाशनातर्फे प्रकाशित करण्यात आले असून दृष्टिहीन व्यक्तींसाठी पुस्तकाची ब्रेल आवृत्ती विकसित केली आहे.