पुण्यात बांधकाम क्षेत्रात ‘कॅसाग्रँड’चा प्रवेश

पुणे, ता. १७ : धोरणात्मक विस्तारातील एक महत्त्वाचा टप्पा गाठत ‘कॅसाग्रँड’ या दक्षिण भारतातील बांधकाम व्यवसाय कंपनीने पुणे बाजारपेठेत प्रवेशाची घोषणा केली आहे. ‘कॅसाग्रँड’ने पुण्यात अप्पर खराडीमध्ये २.८ एकर आणि वाघोलीत १६ एकर जमीन खरेदी करत महाराष्ट्रात पदार्पण केले आहे. या दोन्ही ठिकाणी निवासी प्रकल्प उभे राहणार आहेत.

२००३ मध्ये स्थापन झालेला ‘कॅसाग्रँड’ हा आता दक्षिण भारतातील विश्वासार्ह ब्रॅण्ड झाला आहे. गेल्या दोन दशकांच्या काळात कंपनीने चेन्नई, बंगळूर, कोइमतूर आणि हैदराबाद या प्रमुख शहरांमध्ये अनेक प्रकल्पांच्या माध्यमातून आधुनिक भारतीयांच्या जीवनपद्धतीची नवीन व्याख्या केली आहे. १६० हून अधिक प्रकल्प आणि ५३ दशलक्ष चौरस फुटांहून अधिकची जागा ‘कॅसाग्रँड’ने विकसित केली आहे.
‘कॅसाग्रँड’चे संस्थापक व व्यवस्थापकीय संचालक अरुण एम. एन. हे या महत्त्वपूर्ण विस्ताराबद्दल म्हणाले, ‘‘अनिवासी भारतीयांची वाढलेली संख्या, आयटी, वित्तीय सेवा तसेच वाढते उत्पादन उद्योग यामुळे पुणे शहर देशातील सर्वांत आश्वासक लक्झरी हाउसिंग बाजारपेठांपैकी एक म्हणून वेगाने उदयाला येत आहे. कॅसाग्रँड पुण्याकडे केवळ अफाट संभाव्यता असलेली बाजारपेठ म्हणून नव्हे, तर आमच्या विस्तारासाठी धोरणात्मक माध्यम म्हणून बघत आहे.’’