खराडी-शिवणे रस्त्याची श्‍वेतपत्रिका काढा ः संदीप खर्डेकर

पुणे, ता. ६ ः प्रशासकीय अनास्थेमुळे शिवणे ते खराडी रस्त्याचे काम तेरा वर्षांपासून रखडले आहे. महापालिकेने या रस्त्याच्या स्थितीबाबत श्‍वेतपत्रिका काढून हा रस्ता नेमका कधी पूर्ण होईल, याची माहिती पुणेकरांसमोर उघड करावी, अशी मागणी क्रिएटिव्ह फाउंडेशनचे अध्यक्ष संदीप खर्डेकर यांनी महापालिकेकडे केली आहे.
खर्डेकर यांनी महापालिका आयुक्त नवल किशोर राम यांना याबाबत पत्र पाठविले आहे. खराडी-शिवणे रस्ता हा महत्त्वाकांक्षी प्रकल्प असूनही तो तेरा वर्षांपासून रखडला आहे. रस्त्याचे काम रखडण्यास प्रशासकीय अनास्था आहे. शिवणे ते म्हात्रे पूल या दरम्यानच्या रस्त्याचे काम महालक्ष्मी लॉन्स येथे अडकले आहे. राजाराम पूल ते म्हात्रे पूल यादरम्यानच्या रस्त्यासाठी १२ वर्षांपूर्वी बैठक झाली होती, त्यानंतरही समस्या सुटलेली नाही. राजाराम पुलाकडून डीपी रस्त्यावर येणाऱ्या वाहतुकीमुळे विठ्ठल मंदिर चौकात सातत्याने वाहतूक कोंडी होते. पंडित फार्मसमोर दुभाजक नसल्यामुळे तिथे सातत्याने अपघात होत आहेत. येथे पथारी व्यावसायिकांवर कुठलीही कारवाई होत नाही. त्यामुळे आयुक्तांनी शिवणे-खराडी रस्त्याची श्‍वेतपत्रिका काढावी, अशी मागणी खर्डेकर यांनी महापालिका आयुक्तांकडे केली आहे.