इंडिगोविरुद्ध ज्येष्ठाची तक्रार

पुणे, ता. ५ : पुणे विमानतळावरून उड्डाण करणाऱ्या इंडिगो एअरलाईन्सच्या विमानाने सतत वेळापत्रक बदलून रद्द केले. त्यामुळे प्रवाशांची दिशाभूल आणि मानसिक त्रास झाल्याप्रकरणी एका ज्येष्ठ नागरिकाने तळेगाव दाभाडे पोलिस ठाण्यात तक्रार दिली आहे. हरजीत सिंग वालिया (वय ६३, रा. तळेगाव दाभाडे) असे तक्रारदार ज्येष्ठ व्यक्तीचे नाव आहे. वालिया यांनी चार डिसेंबर रोजी पहाटे पुण्यातून सुटणाऱ्या विमानासाठी तिकीट आरक्षित केले होते. मात्र, दुपारपर्यंत या विमानाच्या वेळा सात वेळा पुढे ढकलण्यात आल्या. वालिया हे अमृतसरजवळील त्यांच्या मूळ गावी धार्मिक विधीनिमित्त निघाले होते. परंतु या सततच्या विलंबामुळे त्यांना प्रवास रद्द करावा लागला. मनस्ताप, शारीरिक थकवा आणि विमानतळावर वरिष्ठ अधिकारी हजर नसल्यामुळे निर्माण झालेल्या परिस्थितीबद्दल त्यांनी तीव्र नाराजी व्यक्त केली. इंडिगो एअरलाईन्स आणि संबंधित अधिकाऱ्यांवर गुन्हा दाखल करावा. तसेच, अशा प्रकारच्या फसवणुकीची पुनरावृत्ती रोखण्यासाठी कठोर कारवाई करावी, मागणीही त्यांनी तक्रार अर्जात केली आहे.