महाविद्यालयीन युवकाला कासेवाडीत बेदम मारहाण

पुणे, ता. ६ : किरकोळ वादातून महाविद्यालयीन युवकाला बेदम मारहाण केल्याची घटना भवानी पेठेतील कासेवाडी भागात घडली. टोळक्याने केलेल्या मारहाणीत युवकाच्या डोक्याला दुखापत झाली आहे. याबाबत युवकाने खडक पोलिस ठाण्यात फिर्याद दिली असून, सहा जणांवर गुन्हा दाखल झाला आहे. पोलिसांनी दिलेल्या माहितीनुसार, तक्रारदार युवक घोरपडेतील बी. टी. कवडे रस्ता परिसरातील रहिवासी आहे. महाविद्यालयात एकमेकांकडे बघण्यावरून आरोपी आणि तक्रारदार युवकात वाद झाला होता. तक्रारदार युवक चार डिसेंबरला दुपारी भवानी पेठेतील कासेवाडी भागातून निघाला होता. तेथील कोणी गार्डनजवळ टोळक्याने त्याला अडवले आणि शिवीगाळ केली. तसेच लाथाबुक्क्यांनी बेदम मारहाण केली. त्याच्या डोक्यात फरशीचा तुकडा मारल्याने त्याच्या डोक्याला दुखापत झाली. पसार झालेल्या आरोपींचा शोध घेण्यात येत आहे.