‘रोटरी डिस्ट्रिक्ट’तर्फे मराठी साहित्य संमेलन

पुणे, ता. १० : वाचन संस्कृतीची निकोप वाढ, रोटेरियन्समध्ये साहित्याची अभिरुची निर्माण करणे आणि साहित्यप्रेमी रसिकांना समृद्ध सांस्कृतिक अनुभव देण्यासाठी रोटरी डिस्ट्रिक्टतर्फे दुसऱ्या रोटरी डिस्ट्रिक्ट मराठी साहित्य संमेलनाचे आयोजन करण्यात आले आहे. कोथरूडमधील यशवंतराव चव्हाण नाट्यगृहात २० व २१ डिसेंबरला हे संमेलन होणार असून, अध्यक्षपद कवी प्रा. प्रवीण दवणे भूषविणार आहेत, अशी माहिती संमेलनाच्या कार्याध्यक्ष मधुमिता बर्वे यांनी बुधवारी पत्रकार परिषदेत दिली.
संमेलनाची सुरुवात २० डिसेंबरला सकाळी ९.१५ वाजता ग्रंथदिंडीने होणार आहे. सकाळी १० वाजता डॉ. शंकर अभ्यंकर यांच्या हस्ते संमेलनाचे उद्‍घाटन होणार आहे. यावेळी उच्च व तंत्रशिक्षणमंत्री चंद्रकांत पाटील उपस्थित राहणार आहेत. या दिवशी साहित्य, चित्रपट आणि रंगभूमीवर आधारित परिसंवाद, गझल संमेलन तसेच रणजित देसाई लिखित ‘हे बंध रेशमाचे’ या संगीत नाटकाचा प्रयोग होणार आहे.
अभिनेते अमोल पालेकर आणि दिग्दर्शिका संध्या गोखले यांच्याशी २१ डिसेंबरला सकाळी १० वाजता संवादात्मक कार्यक्रम, तर दुपारी २.३० वाजता गो. नी. दांडेकर यांच्या साहित्यावर आधारित कार्यक्रम होणार आहे. सायंकाळी ५.३० वाजता ज्येष्ठ अभिनेते शरद पोंक्षे यांना व्होकेशनल एक्सलन्स पुरस्काराने सन्मानित करणार आहे. श्री शिव प्रतिष्ठान हिंदुस्थानचे संस्थापक संभाजी भिडे गुरुजी यांच्या हस्ते हा पुरस्कार दिला जाणार आहे. त्यानंतर भिडे गुरुजी यांची विशेष मुलाखत होणार आहे. यावेळी केंद्रीय नागरी हवाई वाहतूक राज्यमंत्री मुरलीधर मोहोळ उपस्थित राहणार आहेत.