कौतुकाची थाप देत रंगला ‘जागर मानवी हक्काचा’

पुणे, ता. १३ : जागतिक मानवाधिकार दिनानिमित्त ‘मानवी हक्क संरक्षण व जागृती संस्था,'' ‘जिल्हा विधी सेवा प्राधिकरण, पुणे'' आणि जाधवर लॉ कॉलेज यांच्यावतीने मराठा चेंबर ऑफ कॉमर्स येथे ‘जागर मानवी हक्काचा’ हा कार्यक्रम आयोजित केला होता. यावेळी जिल्हा व सत्र न्यायालयाचे प्रमुख न्यायाधीश महेंद्र महाजन, जिल्हा विधी सेवा प्राधिकरणाच्या सचिव न्यायाधीश रेवती देशपांडे, प्राचार्य डॉ. सुधाकरराव जाधवर, प्रमुख जिल्हा व सत्र न्यायाधीश (निवृत्त) आर. व्ही. जटाळे, लेफ्टनंट कर्नल (निवृत्त) श्रीश कुमार आदी उपस्थित होते.
यावेळी विकास कुचेकर यांनी लिहिलेल्या ‘संविधान बोलतंय’ या पुस्तकाचे प्रकाशन झाले. यावेळी विविध क्षेत्रात उत्कृष्ट कार्य करणाऱ्या मान्यवरांना गौरविण्यात आले. यामध्ये ‘सकाळ’चे मुख्य उपसंपादक व विनोदी साहित्यकार सु. ल. खुटवड, अभिनेता भूषण मंजुळे, सुजाता इळवे, सचिन होळकर, प्रतिमा काळे आणि संतोष जोगदंड यांना मानवाधिकार पुरस्कार प्रदान करण्यात आला. विशेष कार्य मानवाधिकार पुरस्कार विविध सेवाभावी संस्था व व्यक्तींना प्रदान करण्यात आला. यात समाजबंध सामाजिक संस्था, फ्यूअल ग्रुप ऑफ इन्स्टिट्युशन्स, संविधान संवाद समिती, संजीवनी इन्स्टिट्यूट (कराड), मतिमंद मुलांची शाळा, दिशा परिवार, मनोब्रम्हा फाउंडेशन, लोकसेवा परिवार संस्था (सातारा), ॲड. रशिद के. सिद्दीकी, ॲड. उमाकांत आदमाने, संजना करंजावणे आणि प्रकाश बोंदाडे यांना प्रदान करण्यात आला. कार्यक्रमाचे आयोजन मानवी हक्क संरक्षण संस्थेचे अध्यक्ष विकास कुचेकर, संचालक अण्णा जोगदंड, गजानन धराशीवर, मुरलीधर दळवी, संगीत जोगदंड यांनी केले होते.