‘रामायण म्हणजे श्रीरामाने आचरलेला आदर्श मार्ग’

पुणे, ता. १३ : ‘‘आजच्या काळातील पिढीला रामायण ही फक्त प्रभू श्रीरामांची गोष्ट वाटते. मात्र, रामायण म्हणजे केवळ कथा नसून श्रीरामांनी आचरणात आणलेला आदर्श मार्ग आहे,’’ असे मत निरुपणकार डॉ. धनश्री लेले यांनी व्यक्त केले. ग्रंथ पारायण दिंडी पुणे यांच्या वतीने अयोध्या येथे झालेल्या रामरक्षा पठण वर्षपूर्ती, चातुर्मासातील व्रताची सांगता आणि घरोघरी रामरक्षा स्तोत्र पठाणाच्या संकल्पपूर्तीनिमित्त सदाशिव पेठेतील गीता धर्म मंडळ येथे कार्यक्रमाचे आयोजन केले होते. त्यावेळी डॉ. लेले बोलत होत्या. याप्रसंगी परिमंडळ एकचे पोलिस उपायुक्त हृषिकेश रावले, राष्ट्रीय स्वयंसेवक संघ कसबा भाग संघचालक प्रशांत यादव, डॉ. संजीव डोळे, संस्थेचे वीरेंद्र कुंटे, नंदकुमार देव उपस्थित होते. यानिमित्ताने देव, देश आणि धर्मासाठी कार्य करणाऱ्या संस्था आणि शालेय संस्थांचा सन्मान करून त्यांना मदतनिधी प्रदान करण्यात आला. श्री यशोधन नागरी सहकारी पतसंस्था पुणे व चौफेर प्रतिष्ठान यांनी सहकार्य केले. अलका विंझे यांनी सूत्रसंचालन केले.