विद्यार्थ्यांच्या सुरक्षिततेसाठी मार्गदर्शक तत्त्वांच्या पालनाचे आदेश

पुणे, ता. १६ : राज्यातील सर्व शाळांमधील विद्यार्थ्यांच्या सुरक्षिततेच्या दृष्टीने केंद्र सरकारने विद्यार्थी सुरक्षेसंदर्भात दिलेल्या मार्गदर्शक तत्त्वांचे पालन करणे बंधनकारक आहे, असा स्पष्ट आदेश शालेय शिक्षण विभागाने अध्यादेशाद्वारे दिला आहे.
बालकांचा मोफत व सक्तीच्या शिक्षणाचा हक्क अधिनियम २००९च्या कलम १७ नुसार शाळांमध्ये विद्यार्थ्यांना मारणे, कोणत्याही प्रकारची शारीरिक शिक्षा देणे, मानसिक छळ करणे, कमी लेखणे, भेदभाव करणे याला बंदी आहे. असे असतानाही राज्यात शाळांमध्ये सर्रासपणे विद्यार्थ्यांना शिक्षा दिली जात आहे. या पार्श्‍वभूमीवर शिक्षण विभागाने अखेर मार्गदर्शक सूचनांचे पालन करण्यासाठी आणि शाळा व्यवस्थापन, कर्मचारी आणि विभागातील अधिकाऱ्यांवर जबाबदारी निश्‍चित करणारी कार्यपद्धती जाहीर केली आहे.

अशा आहेत मार्गदर्शक सूचना
- विद्यार्थ्यांशी सन्मानपूर्वक संवाद साधावा
- विद्यार्थ्यांच्या तक्रारींवर त्वरित कार्यवाही करावी
- शाळेच्या आवारात गुंडगिरी, भेदभाव करण्यास प्रतिबंध
- शाळेत कोणत्याही व्यक्तीकडून विद्यार्थ्यांच्या सुरक्षेबाबतच्या सूचनांचे उल्लंघन झाल्यास तत्काळ शिक्षणाधिकाऱ्यांच्या निदर्शनास आणावे

शाळा व्यवस्थापक/मुख्याध्यापकांची जबाबदारी
- विद्यार्थी सुरक्षेच्या सूचनांच्या उल्लंघनाच्या घटनेची तत्काळ लेखी नोंद करावी
- संबंधित घटनेची प्राथमिक चौकशी करून दोन दिवसांत शिक्षण विभागास अहवाल सादर करावा
- गुन्हा घडल्याचे निदर्शनास आल्यास २४ तासांत संबंधिताविरोधात पोलिस ठाण्यात तक्रार नोंदवावी