कबड्डीपटू मुलीचा खून करणाऱ्याला जन्मठेप

पुणे, ता. १६ ः एकतर्फी प्रेमातून १५ वर्षींय राष्ट्रीय कबड्डीपटू मुलीचा निर्घृण खून करणाऱ्या आरोपीला न्यायालयाने जन्मठेप आणि पाच हजार रुपये दंडाची शिक्षा सुनावली आहे. अतिरिक्त जिल्हा व सत्र न्यायाधीश एस. आर. साळुंखे यांनी हा निकाल दिला.
शुभम ऊर्फ हृषिकेश बाजीराव भागवत (वय २२) असे शिक्षा सुनावण्यात आलेल्याचे नाव आहे. खून झालेल्या मुलीच्या चुलत बहिणीने याबाबत बिबवेवाडी पोलिस ठाण्यात तक्रार दिली होती. ही घटना १२ ऑक्टोबर २०२१ ला बिबवेवाडीतील यश लॉन्स येथे घडली होती. मृत मुलगी आठवीत होती. तिने प्रेमास नकार दिल्याने; तसेच फोनवर बोलणे टाळल्याच्या रागातून आरोपीने तिच्यावर चाकूने २२ वेळा वार करून निर्घृण खून केला होता. आरोपीने मुलीचा गळा चिरून तिचे धड शरीरापासून वेगळे केले होते, असे तक्रारीत नमूद आहे.
‘‘हा दुर्मिळातील दुर्मिळ गुन्हा आहे. या प्रकरणात एकूण १२ साक्षीदारांनी साक्ष नोंदविली आहे. त्यापैकी प्रत्यक्षदर्शी साक्षीदारांनी आरोपीला न्यायालयात ओळखले असून निर्भीडपणे साक्ष नोंदविली आहे. मृत मुलगी आईवडिलांचे एकुलते एक अपत्य होते,’’ असा युक्तिवाद विशेष सरकारी वकील ॲड. हेमंत झंजाड यांनी केला.

जन्मठेपेची शिक्षाच योग्य ः न्यायाधीश
हा खटला दुर्मिळातील दुर्मिळ प्रकरणांच्या श्रेणीत येईल असे मानणे कठीण होईल. पण सरकारी पक्षाच्या म्हणण्यानुसार हा गुन्हा क्रूर होता. शवविच्छेदन अहवालानुसार मुलीच्या मृतदेहावर २५ छेदलेल्या जखमा आढळल्या. या गुन्ह्यासाठी मृत्युदंड किंवा जन्मठेपेची शिक्षा अशा दोनच तरतुदी आहेत. जन्मठेप हा नियम आहे आणि मृत्युदंड हा अपवाद आहे. मृत्युदंडाची शिक्षा देऊन हे अपवादात्मक प्रकरण म्हणून घोषित होणे हे माझ्या न्यायिक मनाला पटत नाही. त्यामुळे जन्मठेपेची शिक्षा ही आरोपीसाठी योग्य शिक्षा आहे, असे निरीक्षण नोंदवीत न्यायालयाने आरोपीला जन्मठेपेची शिक्षा सुनावली.