आढाव यांच्या चळवळीसाठी कार्यकर्त्यांच्या पाठीशी : गोऱ्हे

पुणे, ता. १६ : ‘‘ज्येष्ठ सामाजिक कार्यकर्ते बाबा आढाव यांचे विचार आणि कार्य अमर आहे. बाबांनी आयुष्यभर जोपासलेली सामाजिक चळवळ यापुढेही अविरत सुरू राहावी, यासाठी आम्ही सर्वतोपरी कार्यकर्त्यांच्या पाठीशी खंबीरपणे उभे राहू,’’ असे आश्वासन विधान परिषदेच्या उपसभापती डॉ. नीलम गोऱ्हे यांनी दिले.
डॉ. गोऱ्हे यांनी आढाव यांच्या निवासस्थानी भेट देऊन शीला आढाव व अन्य कार्यकर्त्यांचे सांत्वन केले. या भेटीदरम्यान डॉ. गोऱ्हे यांनी बाबांच्या आठवणींना उजाळा देत आढाव कुटुंबीयांना धीर दिला. बाबांचा लढाऊ, निर्भीड आणि समाजाभिमुख वारसा जपणे हीच त्यांना खरी आदरांजली ठरेल, अशी भावना त्यांनी व्यक्त केली. याप्रसंगी विविध सामाजिक चळवळीतील कार्यकर्ते व शिवसेनेचे पदाधिकारी उपस्थित होते.