विशाल अग्रवालसह आठ जणांचा जामीन फेटाळला

पुणे, ता. १६ ः कल्याणीनगरमधील पोर्श अपघातानंतर पुरावे नष्ट करण्यासाठी ससून रुग्णालयात अल्पवयीन आरोपीसह त्याच्या मित्रांचे रक्ताचे नमुने बदलल्याप्रकरणी दाखल असलेल्या गुन्ह्यात विशाल अग्रवाल याच्यासह आठ आरोपींचा जामीन अर्ज मुंबई उच्च न्यायालयाने मंगळवारी फेटाळला.

अल्पवयीन मुलाचे वडील विशाल अग्रवाल, अरुणकुमार सिंग, अश्पाक मकानदार, अमर गायकवाड, आदित्य सूद, आशिष मित्तल, ‘ससून’च्या न्यायवैद्यक विभागाचे तत्कालीन प्रमुख डॉ. अजय तावरे आणि आपत्कालीन विभागाचे तत्कालीन मुख्य वैद्यकीय अधिकारी डॉ. श्रीहरी हाळनोर यांचा जामीन फेटाळण्यात आला. पुरावे नष्ट करण्यासाठी ससून रुग्णालयात अल्पवयीन आरोपीसह त्याच्या मित्रांचे रक्ताचे नमुने बदलल्याचा गुन्हा कल्याणीनगर अपघात प्रकरणात दाखल आहे. या गुन्ह्यात पुणे सत्र न्यायालयात दहा आरोपींविरोधात आरोप निश्‍चिती झाली आहे. सरकार पक्षातर्फे विशेष सरकारी वकील शिशिर हिरे या खटल्याचे कामकाज पाहात आहेत.
आरोपींकडून साक्षीदारांवर प्रभाव टाकण्याबरोबरच पुराव्यामध्ये छेडछाड करण्याची शक्यता आहे, ही बाब विशेष सरकारी वकील शिशिर हिरे यांनी निदर्शनास आणून दिली. या प्रकरणात अल्पवयीन मुलाची आई शिवानी अग्रवाल हिला महिला असल्याकारणाने मुंबई उच्च न्यायालयाने आधीच अंतरिम जामीन दिला आहे. दरम्यान, विशाल अग्रवाल याने आई आजारी असल्याने तात्पुरता जामीन मिळण्यासाठी केलेला अर्जही पुणे सत्र न्यायालयाने फेटाळला होता. त्यामुळे विशाल अग्रवाल याच्यासह उर्वरित नऊ जणांनी मुंबई उच्च न्यायालयात जामिनासाठी अर्ज केला. मात्र, ॲड. शिशिर हिरे व ॲड. शुभम जोशी यांनी उच्च न्यायालयात सरकारी पक्षाची बाजू मांडली. रक्ताचे नमुने बदलून आरोपींनी गंभीर गुन्हा केला आहे. आरोपींना जामीन दिल्यास ते पुराव्यात छेडछाड करू शकतात, असे ॲड. हिरे यांनी न्यायालयात सांगितले.