बंडू आंदेकरच्या दोन वकिलांवर गुन्हा

पुणे, ता. १८ ः कुख्यात गुंड बंडू आंदेकरच्या नातवाच्या घरात झडती घेत असताना सरकारी कामात अडथळा आणल्याप्रकरणी दोन वकिलांवर समर्थ पोलिसांकडून गुन्हा दाखल करण्यात आला. या कारवाईत पोलिसांनी दोन पिस्तुलांसह चांदीचे दागिने, रोकड, तसेच कागदपत्रे जप्त केली.
याप्रकरणी वकिलांवर गुन्हा दाखल करण्यात आला आहे. याबाबत गुन्हे शाखेच्या खंडणी विरोधी पथकातील पोलिस हवालदार प्रफुल्ल चव्हाण यांनी समर्थ पोलिस ठाण्यात फिर्याद दिली आहे. पोलिसांनी दिलेल्या माहितीनुसार, खंडणी विरोधी पथकातील पोलिस कर्मचारी मयूर भोकरे, अमोल आवाड हे नाना पेठेत गस्त घालत होते. त्यावेळी आंदेकर टोळीतील तन्मय गणेश कांबळे (रा. राजेवाडी, नाना पेठ) याच्याकडे पिस्तूल असल्याची माहिती मिळाली. त्यानंतर पोलिसांच्या पथकाने कांबळेला ताब्यात घेतले. तेव्हा कांबळेने एका अल्पवयीनाकडे पिस्तूल ठेवायला दिल्याची माहिती मिळाली.
पोलिसांचे पथक नाना पेठेतील डोके तालीम परिसरात गेले. डोके तालमीजवळ असलेल्या चार मजली इमारतीत आंदेकरची मुलगी वृंदावनी वाडेकर राहायला आहेत. तिची मुलगा स्वराज वाडेकर याला अटक करण्यात आली आहे. पोलिसांनी घराची झडती घेतली. पोलिसांनी तेथून दोन पिस्तुले, एक एअर गन, १७ लाख १५ हजार २६० रुपये, १८ लाख ८४ हजार रुपयांच्या चांदीच्या वस्तू असा मुद्देमाल जप्त केला. वाडेकर याच्या इमारतीतील भाडेकरू प्रभू मारुती लोकरे याच्या घराची झडती घेण्यात आली. पोलिसांनी ई-साक्ष ॲपद्वारे चित्रीकरण केले. त्यावेळी दोन वकील तेथे आले. ‘बंडू आंदेकर आमचे अशील आहेत. तुम्ही महिलेच्या घराचे कुलूप तोडून आत शिरले’, असे वकिलांनी त्यांना सांगितले. त्यावेळी खंडणी विरोधी पथकातील वरिष्ठ पोलिस निरीक्षक अश्‍विनी जगताप तेथे होत्या.

कारवाई कायदेशीर, पोलिसांना त्यांचे काम करू द्या
‘आमची कारवाई कायदेशीर असून, पोलिसांना काम करू द्या’, असे पोलिस निरीक्षक जगताप यांनी वकिलांना सांगितले. त्यानंतर वकिलांनी त्यांच्याकडे घरझडतीची परवानगी आहे का? अशी विचारणा करून अरेरावी केली, तसेच सरकारी कामात अडथळा आणला, असे पोलिस हवालदार प्रफुल्ल चव्हाण यांनी फिर्यादीत म्हटले आहे. वरिष्ठ पोलिस निरीक्षक उमेश गित्ते तपास करत आहेत.