पीएमपी बसच्या धडकेत पादचारी महिलेचा मृत्यू

पुणे, ता. १८ ः पीएमपी बसच्या धडकेत पादचारी महिलेचा मृत्यू झाल्याची घटना मंगळवारी (ता. १६) सकाळी अकराच्या सुमारास हडपसरमधील गाडीतळ परिसरात घडली. या घटनेनंतर गाडीतळ परिसरात एका संघटनेकडून आंदोलन करण्यात आले. या प्रकरणी पीएमपी चालकावर गुन्हा दाखल करण्यात आला.
सुमन हनुमंत क्षीरसागर (वय ४९, रा. मार्केट यार्ड) असे मृत्युमुखी पडलेल्या महिलेचे नाव आहे. याबाबत प्रांजल बनसोडे (वय १९, रा. हडपसर ) हिने हडपसर पोलिस ठाण्यात फिर्याद दिली. पोलिसांनी दिलेल्या माहितीनुसार, प्रांजल आणि तिची मावशी सुमन या १६ डिसेंबरला सकाळी अकराच्या सुमारास हडपसरमधील गाडीतळ परिसरातून निघाल्या होत्या. बडदे उद्यानासमोरून त्या रस्ता ओलांडत होत्या. त्यावेळी भरधाव पीएमपी बसने सुमन यांना धडक दिली. अपघातात त्या गंभीर जखमी झाल्या. त्यांना खासगी रुग्णालयात दाखल करण्यात आले. उपचारांपूर्वीच त्यांचा मृत्यू झाला. सहायक पोलिस निरीक्षक हसीना शिकलगार या गुन्ह्याचा तपास करत आहेत.

दुचाकीस्वार तरुणाचा मृत्यू
नगर रस्त्यावरील लोणीकंद परिसरात भरधाव टेम्पोच्या धडकेत दुचाकीस्वार तरुणाचा मृत्यू झाल्याची घटना बुधवारी घडली. या प्रकरणी टेम्पोचालकावर गुन्हा दाखल करण्यात आला. करण अर्जुन सूर्यकर (वय २१, रा. भावडी, ता. हवेली) असे मृत्युमुखी पडलेल्या तरुणाचे नाव आहे. याबाबत त्याची आई नागाबाई (वय ५०) यांनी लोणीकंद पोलिस ठाण्यात फिर्याद दिली आहे. पोलिसांनी दिलेल्या माहितीनुसार, दुचाकीस्वार करण बुधवारी (ता. १७) सकाळी नऊच्या सुमारास लोणीकंद ते भावडी रस्त्यावरून निघाला होता. त्या वेळी भरधाव टेम्पोने दुचाकीस्वार करणला धडक दिली. अपघातात त्याचा मृत्यू झाला. पसार झालेल्या टेम्पोचालकाचा शोध घेण्यात येत असून, पोलिस उपनिरीक्षक दिलीप पालवे तपास करत आहेत.