कौटुंबिक वादातून पत्नीचा गळा आवळून खुनाचा प्रयत्न

पुणे, ता. २४ : कौटुंबिक वादातून पोलिसांकडे तक्रार दिल्याच्या कारणावरून पत्नीचा दोरीने गळा आवळून आणि डोक्यात लोखंडी गज मारून खून करण्याचा प्रयत्न केला. ही घटना हडपसर येथील महम्मदवाडी परिसरात घडली. या प्रकरणी काळेपडळ पोलिसांनी पतीविरुद्ध गुन्हा दाखल केला आहे.
अनिल पंढरीनाथ माने (वय ४२, रा. तरवडे वस्ती, महम्मदवाडी, हडपसर) असे आरोपीचे नाव आहे. याबाबत त्याची पत्नी जया माने (वय ३५) हिने काळेपडळ पोलिस ठाण्यात फिर्याद दिली आहे. पोलिसांनी दिलेल्या माहितीनुसार, आरोपी अनिल माने आणि त्याच्या पत्नीमध्ये कौटुंबिक कारणावरून वारंवार वाद होत होते. या वादातून जया हिने यापूर्वी पोलिसांकडे तक्रार दिली होती. सोमवारी (ता. २२) सायंकाळी सहाच्या सुमारास पुन्हा दोघांमध्ये वाद झाला. या वादातून संतप्त झालेल्या अनिल माने याने पत्नीचा दोरीने गळा आवळला तसेच डोक्यात लोखंडी गजाने वार केला. या हल्ल्यात जया माने गंभीर जखमी झाली. याबाबत माहिती मिळताच पोलिसांनी घटनास्थळी भेट दिली. जखमी महिलेस उपचारासाठी रुग्णालयात दाखल करण्यात आले आहे. पुढील तपास पोलिस उपनिरीक्षक विनायक गुरव करीत आहेत.