धायरीतील ज्येष्ठास ३६ लाखांचा गंडा

पुणे, ता. २४ : सायबर चोरट्यांनी पोलिस असल्याचे भासवून एका ज्येष्ठ नागरिकाला पोर्नोग्राफी करीत असल्याची भीती दाखवून ३६ लाख रुपयांची फसवणूक केली. हा प्रकार धायरीतील डीएसके विश्व परिसरात घडला. याप्रकरणी नांदेड सिटी पोलिस ठाण्यात गुन्हा दाखल करण्यात आला आहे.
याबाबत धायरीतील एका ७९ वर्षीय ज्येष्ठ व्यक्तीने फिर्याद दिली आहे. पोलिसांनी दिलेल्या माहितीनुसार, सायबर चोरट्यांनी आठ डिसेंबर रोजी या ज्येष्ठ नागरिकाशी मोबाईलवर संपर्क साधला. ‘डेटा प्रोटेक्शन बोर्ड ऑफ इंडिया’मधून दीपककुमार शर्मा आणि तोतया पोलिस अधिकारी संदीप राव या दोन सायबर चोरट्यांनी ज्येष्ठास पोलिस असल्याचे भासवले. ‘तुमच्या मोबाईलवरून अश्लील कॉल्स आणि पोर्नोग्राफी केली जात असून बऱ्याच तक्रारी आम्हाला प्राप्त झाल्या आहेत,’ असे सांगितले. तसेच, फिर्यादीच्या मुंबईतील एका बॅंकेच्या शाखेतून दहशतवाद्यांना निधी पुरवला जात असल्याचे सांगत सर्वोच्च न्यायालयाने अटकेचे समन्स काढल्याची भीती दाखवली. अटक टाळण्यासाठी ज्येष्ठास बॅंक खात्यात ३६ लाख रुपये जमा करण्यास भाग पाडले. फसवणूक झाल्यानंतर ज्येष्ठ नागरिकाने पोलिस ठाण्यात तक्रार दिली. त्यानुसार नांदेड सिटी पोलिसांनी अज्ञात सायबर चोरट्यांविरुद्ध गुन्हा दाखल केला आहे.