‘आनंदाचे झाड’ पुस्तकाचा शनिवारी प्रकाशन समारंभ

पुणे, ता. २५ : सकाळ प्रकाशन प्रकाशित आणि राजेन्द्र खेर लिखित ‘आनंदाचे झाड’ या पुस्तकाचा प्रकाशन समारंभ शनिवारी (ता. २८) अभिनेते, दिग्दर्शक सुबोध भावे यांच्या हस्ते आणि संगीतकार कौशल इनामदार यांच्या उपस्थितीत होणार आहे.
पुस्तकाविषयी :
जीवन सुंदरतेने जगण्याची प्रेरणा ‘आनंदाचे झाड’ हे पुस्तक देते. बऱ्याचदा भौतिक सुखं मिळविण्याच्या हेतूने मनुष्य धार्मिकस्थळांकडे वळतो; तर काहींना मानसिक शांती हवी असते, म्हणून अध्यात्म मार्गाचा अवलंब केला जातो. सुखाचे विषय हे व्यक्तिसापेक्ष असतात. आनंद ही मात्र आत्म्याची एकमात्र भावना असते. याचे राजेन्द्र खेर यांनी स्वानुभवांतून मार्गदर्शन केले आहे. अध्यात्माची आवड असणारे, दैनंदिन जीवनात अध्यात्माचा समावेश करू इच्छिणारे, छोट्या-छोट्या गोष्टींतून आनंद घेऊ इच्छिणाऱ्या सर्वांसाठी हे पुस्तक उपयुक्त आहे.
खेर हे साहित्यिक, अभ्यासक आणि निरूपणकर्ते असून ऐतिहासिक, पौराणिक व चरित्र कादंबऱ्यांचे लेखक आहेत. अध्यात्म, श्रीमद् भगवद्‍गीता, महाभारत यांतील विविध विषयांवर त्यांनी सुमारे ५०० व्याख्याने दिली आहेत. युवकांनी आणि अध्यात्माची आवड असणाऱ्यांनी या कार्यक्रमाला उपस्थित राहावे, असे आवाहन सकाळ प्रकाशनाने केले आहे.
टिळक रस्त्यावरील महाराष्ट्र साहित्य परिषदेच्या माधवराव पटवर्धन सभागृहात शनिवारी सायंकाळी ६.३० वाजता होणारा हा कार्यक्रम सर्वांसाठी खुला आहे.
संपर्क : ९८८१५९८८१५ व ८८८८८४९०५०