नवजात अर्भक मृतावस्थेत सापडले

पुणे, ता. २५ : विमाननगर परिसरातील एका नियोजित गृहप्रकल्पाच्या आवारात नवजात अर्भक मृतावस्थेत सापडल्याची घटना उघडकीस आली आहे. या प्रकरणी विमानतळ पोलिसांनी अज्ञातांवर गुन्हा दाखल केला आहे.
याबाबत दिग्विजय देसाई (वय २३, रा. विमाननगर) यांनी विमानतळ पोलिस ठाण्यात फिर्याद दिली. या फिर्यादीनुसार अज्ञातांवर गुन्हा दाखल झाला. पोलिसांनी दिलेल्या महितीनुसार, विमाननगर येथील कोणार्कनगर फेज वन परिसरात बांधकाम मजुरांची वसाहत आहे. देसाई हे पर्यवेक्षक म्हणून काम करतात. मंगळवारी (ता. २४) दुपारी दोनच्या सुमारास महिलांच्या प्रसाधनगृहाजवळ साचलेल्या पाण्यात नवजात अर्भक आढळले. त्यानंतर या घटनेची माहिती पोलिसांना कळविण्यात आली. पोलिसांनी घटनास्थळी भेट दिली. नवजात अर्भकाला तातडीने ससून रुग्णालयात दाखल केले, मात्र उपचारांपूर्वीच अर्भकाचा मृत्यू झाल्याचे वैद्यकीय तज्ज्ञांनी सांगितले.