अल्पवयीन मुलीवर अत्याचार; मैत्रिणीसह चौघांना सक्तमजुरी

पुणे, ता. ३० ः अल्पवयीन मुलीवर अत्याचार करणाऱ्या दोघांना न्यायालयाने २० वर्षे सक्तमजुरीची शिक्षा सुनावली आहे, तर मुलीचे अपहरण केल्याच्या गुन्ह्यात तिच्या मैत्रिणीसह अन्य एकाला १० वर्षे सक्तमजुरीची शिक्षा झाली आहे. अतिरिक्त सत्र न्यायाधीश ए. एस. वाघमारे यांनी हा आदेश दिला आहे.
रिझवान इक्राबद्दीन अन्सारी (वय ३५, रा. उत्तमनगर) आणि दशरथ आत्माराम चव्हाण (वय २२, वडगाव बुद्रुक) या दोघांना २० वर्षे शिक्षा झाली आहे. रिझवानला १३ हजार ५०० रुपये आणि दशरथला १० हजार रुपये दंड सुनावण्यात आला आहे, तर बलात्कार झालेल्या मुलीची मैत्रीण उज्ज्वला रवींद्र आतकरे (वय २३, सिंहगड रोड) आणि साजिद बिंदू अन्सारी (वय २६, रा. एरंडवणा) या दोघांना १० वर्षे सक्तमजुरीची शिक्षा सुनावण्यात आली आहे. उज्ज्वलाला सात हजार ५०० आणि साजिदला ३ हजार रुपये दंड भरावा लागणार आहे. दंडापैकी मुलीला २० हजार रुपये देण्यात यावेत, असेही आदेशात म्हटले आहे. या खटल्याचे कामकाज सरकार पक्षातर्फे अतिरिक्त सरकारी वकील मारुती वाडेकर यांनी पाहिले.
१६ वर्षीय मुलगी रस्त्याने पायी जात असताना तिच्या हातातून मोबाईल पडला. त्यावरून वाहन गेल्याने तो खराब झाला. घरचे रागावतील म्हणून ती मैत्रीण उज्ज्वलाकडे गेली. मोबाईल उद्या दुरुस्त करून देतो, असे म्हणत तिने मुलीला तिच्या घरी राहण्यास भाग पाडले. त्या रात्री दशरथने मुलीवर अत्याचार केला. त्यानंतर मोबाईल दुरुस्तीसाठी तळेगावला जावे लागेल, असे आरोपींनी तिला सांगितले. मुलीने त्यास नकार दिला. मात्र, घडलेली घटना घरी सांगेल, असे धमकावून आरोपींनी रिक्षा बोलावली. त्यामध्ये रिझवान आणि साजिद होते. ते रिक्षामधून मुलीला भूगाव येथील एका लॉजवर घेऊन गेले. तिथे रिझवानने तिच्यावर बलात्कार केला. तिने विरोध करण्याचा प्रयत्न केला असता रिझवानने मारहाण केली, तर साजिद आणि उज्ज्वलाने धमकाविल्याचे फिर्यादीत नमूद आहे. त्यानंतर मुलीला राजाराम पूल येथे सोडून सर्वजण निघून गेले होते.