मुलाचा खून करणाऱ्या वडिलांना जन्मठेपेची शिक्षा

पुणे, ता. १ : कौटुंबिक वादातून कुऱ्हाड डोक्यात घालून मुलाचा खून करणाऱ्या वडिलांना न्यायालयाने जन्मठेप आणि एक हजार रुपये दंडाची शिक्षा सुनावली. अतिरिक्त सत्र न्यायाधीश ए. आय. पेरमपल्ली यांनी हा निकाल दिला.
दशरथ चिमाजी जमदाडे (वय ६५, रा. माळवाडी वीर, ता. पुरंदर) असे जन्मठेप झालेल्या वडिलांचे नाव आहे. गणेश (वय ३२) याचा खून झाला होता. या प्रकरणी गणेशचा चुलत भाऊ योगेश जमदाडे याने सासवड पोलिसात फिर्याद दिली होती. सरकारी पक्षातर्फे अतिरिक्त सरकारी वकील प्रदीप गेहलोत यांनी या खटल्याचे काम पाहिले. त्यांना जिल्हा न्यायालय पैरवी अधिकारी पोलिस निरीक्षक संतोष घोळवे, सत्र न्यायालय पैरवी अंमलदार पोलिस उपनिरीक्षक विद्याधर निचित, न्यायालय पैरवी अंमलदार सहायक पोलिस उपनिरीक्षक जयसिंग जाधव यांनी कामकाजासाठी मदत केली.
१५ जानेवारी २०१९ ला गणेशचा घरात खून झाला होता. दशरथ याने मुलाच्या डोक्यात, डाव्या कानावर कुऱ्हाडीने वार करून त्याचा खून केल्याचे फिर्यादीत नमूद आहे. या प्रकरणी सासवड पोलिसांनी तपास करून न्यायालयात दोषारोपपत्र दाखल केले होते.