प्राणीप्रेमी तरुणीने वाचविला मांजरीचा जीव

पुणे, ता. ६ : अपघातामुळे पाठीच्या मणक्‍याला गंभीर दुखापत होऊन मणका मोडलेल्‍या मांजरीवर यशस्‍वी उपचार झाले. तब्बल सहा महिन्यानंतर कोणत्याही वेदनेशिवाय ती पुन्हा चालू लागली.
राधिका दीक्षित यांना रस्त्याच्या कडेला बेशुद्धावस्थेत मांजर आढळली. तिने तिची चालण्याची क्षमता गमावली होती. राधिका यांनी त्‍या मांजरीला उपचारासाठी बाणेर रस्‍त्‍यावरील स्मॉल अॅनिमल क्लिनिक येथे प्राण्‍यांच्‍या दवाखान्‍यात दाखल केले. पशुवैद्यकीय शल्यचिकित्सक डॉ. नरेंद्र परदेशी यांनी तिच्‍यावर उपचार सुरू केले. एक्स-रेमध्ये मणक्‍याला फ्रॅक्चर झाल्याचे दिसून आले आणि तिच्या रक्त चाचण्यांमध्ये अनेक कमतरता दिसून आल्या. डॉ. परदेशी यांनी ताबडतोब तिला वेदना कमी करण्यासाठी आणि तिची प्रकृती सुधारण्यासाठी विटकोफोल इंजेक्शन आणि औषधे देण्यास सुरुवात केली. हा प्रकार जानेवारीमध्‍ये घडला होता. तिच्या प्रकृतीचे निरीक्षण केल्यानंतर ५ फेब्रुवारी रोजी शस्त्रक्रिया करून तिचा पाठीचा मणका सरळ केला. परंतु शस्त्रक्रियेनंतर काळजी घेणे अत्यंत महत्त्वाचे होते. डॉ. परदेशी यांनी तिला शस्त्रक्रियेच्या जागेवर चाटणे किंवा चावणे टाळण्यासाठी ताबडतोब एलिझाबेथ कॉलर लावले. नंतर पुढील काही महिने जखमेची काळजी घेण्यात आली. डॉक्‍टरांच्‍या पथकाने तिला बरे करण्‍यासाठी दिवसरात्र मेहनत केली. तिने उपचारांना चांगला प्रतिसाद दिला व जून मध्ये सहा महिन्‍यानंतर तिच्या पाठीचा मणका पूर्णतः बरा झाला.
स्मॉल अ‍ॅनिमल क्लिनिकचे पशुवैद्यकीय सर्जन डॉ. नरेंद्र परदेशी म्‍हणाले की, या मांजरीने सर्व काही सहन केले व जगण्याची कधीच गमावली नाही. वेळीच उपचारांमुळे ती बरी झाली. ती वेदनामुक्त राहावी यासाठी आता अ‍ॅक्युप्रेशर आणि अ‍ॅक्युपंक्चर सारख्या पर्यायी उपचारांवर करण्‍यात येत आहेत. राधिका दीक्षित म्‍हणाल्‍या की, आज ती सोफ्यांवरून उड्या मारत आहे, खेळण्यांसोबत खेळतेय आणि आत्मविश्वासाने वावरत आहे.