पुण्यात मोहरमनिमित्त मिरवणूक

पुणे, ता. ६ ः मोहरमनिमित्त पुण्यातील मध्यवर्ती भागांत मुस्लिम बांधवांनी पारंपरिक पद्धतीने ताबूत, पंजे, छबिले यांची मिरवणूक काढली. ‘ये अलविदा, ये अलविदा... शाहेशही दो अलविदा’ असे म्हणत या मिरवणुकीत त्यांनी सहभाग घेतला होता.
शनिवारी (ता. ५) रात्री दहा वाजता कॅम्पमधील बन्नू मुकादम ताबूतला वरिष्ठ पोलिस निरीक्षक गिरीशकुमार दिगावकर यांच्या हस्ते पुष्पहार अर्पण करण्यात आला. त्यानंतर मिरवणुकीला सुरुवात झाली. यावेळी माजी मंत्री बाळासाहेब शिवरकर, मुस्लिम औकाफ वेल्फेअर ट्रस्टचे कार्याध्यक्ष मुश्ताक पटेल, ताबूत समितीचे विश्वस्त इमाद सय्यद, पुणे कँन्टोन्मेंट बोर्डाचे माजी उपाध्यक्ष मंजूर शेख, अॅड. अर्जुन खुरपे आदी उपस्थित होते. मिरवणूक मार्गावर नागरिकांनी ताबूत आणि पंजांचे दर्शन घेतले. यावेळी सामाजिक संस्थांनी सरबतचे वाटप केले.
कॅम्पमधील बन्नू मुकादम, यंग भोपळा चौक, अलजमेतूल, बकर कसाब, नेहरू चौकातील सुभानशहा दर्गा, पर्वती दर्शन येथील छबिल पटेल, गुरुवार पेठेतील हर झेंडेवाले यांच्या ताबुतांसह पंजे आणि छबिले मिरवणुकीत सहभागी झाले होते. छत्रपती शिवाजी महाराज रस्ता, श्रीदत्त मंदिर चौक, हुतात्मा चौक (बुधवार चौक), बेलबाग चौक, शनिवारवाडा, फुटका बुरूज, गाडगीळ पुतळा चौक, जुना बाजार, डेंगळे पूल, शाहीर अमर शेख चौकमार्गे मिरवणुकीचा संगमपूल येथे समारोप करण्यात आला.