शाळा ८, ९ जुलैला बंद राहणार नाहीत

शिक्षण विभागाचा आदेश

पुणे, ता. ६ : राज्यातील अंशतः अनुदानित शाळांच्या मागण्यांबाबत शिक्षक समन्वय संघाने ८ व ९ जुलै रोजी शाळा बंद ठेवण्याचा निर्णय घेतला आहे. मात्र, त्याचा विद्यार्थ्यांच्या शिक्षणावर परिणाम होऊ नये म्हणून शाळा नियमित सुरू राहतील, असा आदेश शिक्षण संचालक डॉ. महेश पालेकर यांनी दिला आहे.
अंशतः अनुदानित शाळांना निधीच्या अभावामुळे शिक्षक समन्वय संघाने ८ व ९ जुलै रोजी राज्यातील प्राथमिक, माध्यमिक आणि उच्च माध्यमिक शाळा बंद ठेवण्याची घोषणा केली आहे. मात्र, शिक्षण संचालक डॉ. महेश पालेकर यांनी विभागीय शिक्षण उपसंचालक तसेच शिक्षणाधिकाऱ्यांना स्पष्ट सूचना देत, ‘विद्यार्थ्यांचे शैक्षणिक नुकसान होणार नाही याची दक्षता घ्या,’ असा आदेश काढला आहे.
शिक्षक समन्वय संघाकडून आझाद मैदानावर अंशतः अनुदानित शाळांच्या विविध प्रश्नांसंदर्भात पाच जूनपासून आंदोलन सुरू आहे. पावसाळी अधिवेशनात सरकारकडून निधीसंदर्भात आश्वासन देण्यात आले होते. मात्र, पुरवणी मागणीत अपेक्षित आर्थिक तरतूद न झाल्याने शिक्षकांमध्ये नाराजी आहे. त्यामुळे दोन दिवसांच्या शाळा बंद आंदोलनाचा निर्णय घेण्यात आला. या पार्श्वभूमीवर शिक्षण विभागाकडून हा आदेश काढण्यात आला आहे.