गुरुग्राम परिषदेत महापालिकेकडून प्रभावी सादरीकरण

पुणे, ता. ८ ः हरियानातील गुरुग्राम येथे पार पडलेल्या महापौर, उपमहापौर आणि प्रशासकीय अधिकाऱ्यांच्या दोनदिवसीय परिषदेत पुणे महापालिकेने नावीन्यपूर्ण व प्रभावी कार्यपद्धतीची मोहर उमटवली. ‘विकसित भारत २०४७’ या व्यापक उद्दिष्टाला चालना देण्यासाठी शहरी स्थानिक स्वराज्य संस्थांच्या भूमिकेवर प्रकाश टाकणाऱ्या या परिषदेत पुणे महापालिकेचे सादरीकरण लक्षणीय ठरले.
या परिषदेचे उद्‍घाटन लोकसभा अध्यक्ष ओम बिर्ला यांच्या हस्ते झाले. यावेळी केंद्रीय गृहनिर्माण व शहरी व्यवहारमंत्री मनोहरलाल खट्टर, हरियानाचे मुख्यमंत्री नायब सिंह यांच्यासह विविध शहरांचे महापौर, उपमहापौर आणि वरिष्ठ प्रशासकीय अधिकारी उपस्थित होते.
पुणे महापालिकेतर्फे माजी महापौर राजलक्ष्मी भोसले, माजी उपमहापौर डॉ. सिद्धार्थ धेंडे आणि अतिरिक्त आयुक्त पृथ्वीराज बी. पी. यांनी प्रतिनिधित्व केले. यामध्ये महापालिकेच्या विविध सेवांबाबत सादरीकरण केले. विशेषतः ‘स्वच्छ’ या संस्थेच्या सहकार्याने २००७ पासून सुरू असलेल्या घरोघरी कचरा संकलन व्यवस्थेची माहिती देण्यात आली. या उपक्रमातून वंचित घटकांना रोजगार व स्वयंरोजगाराच्या संधी कशा मिळाल्या याबाबतही सविस्तर माहिती मांडण्यात आली. तसेच कचऱ्यापासून बायोगॅस व वीजनिर्मिती, क्षेत्रसभा, झोपडपट्टी पुनर्वसन आदी उपक्रमांचीही माहिती देण्यात आली. परिषदेत सहा महापालिकांना त्यांच्या सर्वोत्तम कार्यपद्धती सादर करण्याची संधी देण्यात आली होती. त्यात पुणे महापालिकेने स्वच्छतेसह अर्थसंकल्पात नागरिकांचा सहभाग, ई-गव्हर्नन्स, ‘लाइट हाउस प्रकल्प’ व ‘जायका’सारख्या योजनांचा समावेश असलेले सादरीकरण प्रभावीपणे मांडले. ‘‘पहिल्यांदाच अशा प्रकारची परिषद आयोजित करण्यात आली होती आणि पुणे महापालिकेला त्यात प्रतिनिधित्व करण्याची संधी लाभली. शहराच्या प्रगत प्रशासनाची ही एक मोठी पावतीच आहे,’’ असे पृथ्वीराज बी. पी. यांनी सांगितले.