कोंढव्यात टोळीकडून सात दुचाकींसह रिक्षा जप्त

पुणे, ता. ८ : कोंढवा परिसरातून चोरीला गेलेली रिक्षा शोधताना पोलिसांनी दुचाकी चोरणाऱ्या टोळीतील दोन चोरट्यांना अटक केली. या आरोपींकडून एक रिक्षा आणि सात दुचाकी असा अडीच लाख रुपयांचा मुद्देमाल जप्त केला आहे. आरोपींवर शहरातील विविध पोलिस ठाण्यांत आठ गुन्हे दाखल आहेत.
फिर्यादीची रिक्षा कोंढव्यातील लक्ष्मीनगर भागातून ३० जून रोजी चोरीस गेली होती. या प्रकरणी कोंढवा पोलिस ठाण्यात दाखल गुन्ह्याचा तपास सहाय्यक निरीक्षक राकेश जाधव यांच्या तपास पथकाने सुरू केला. रिक्षा चोरी करणारे दोघे जण पिसोळी परिसरातील खडी मशिन चौकाजवळ थांबल्याची माहिती पोलिस अंमलदार लक्ष्मण होळकर, विकास मरगळे आणि विजय खंगरे यांना खबऱ्यामार्फत मिळाली. त्यानुसार पोलिसांनी सापळा रचून आरोपींना ताब्यात घेतले. प्रल्हाद मुंजाजी ईखे (वय २३, रा. श्रीनाथ डेअरीजवळ, कोंढवा) आणि गजानन ऊर्फ राज दत्ता खटपटे (वय २४, रा. कोंढवा) अशी अटक केलेल्या आरोपींची नावे आहेत. त्यांच्याकडे केलेल्या चौकशीतून चोरीची रिक्षा आणि सात दुचाकी वाहने जप्त करण्यात आली. आरोपींविरुद्ध कोंढवा पोलिस ठाण्यात पाच, लष्कर, खराडी आणि भोर पोलिस ठाण्यात प्रत्येकी एक असे आठ गुन्हे दाखल असल्याचे निष्पन्न झाले. अतिरिक्त पोलिस आयुक्त मनोज पाटील, परिमंडळ पाचचे पोलिस उपायुक्त डॉ. राजकुमार शिंदे, सहाय्यक आयुक्त धन्यकुमार गोडसे, वरिष्ठ पोलिस निरीक्षक विनय पाटणकर, पोलिस निरीक्षक (गुन्हे) नवनाथ जगताप यांच्या मार्गदर्शनाखाली ही कारवाई करण्यात आली.