फर्ग्युसन महाविद्यालयात चार नवीन अभ्यासक्रम

पुणे, ता. ८ : फर्ग्युसन महाविद्यालयात यंदाच्या शैक्षणिक वर्षात चार नवीन अभ्यासक्रम सुरू करण्यात आले आहेत. त्यात प्राचीन भारतीय इतिहास, संस्कृती, पुरातत्त्वशास्त्र आणि डेटा सायन्स या दोन विषयांवरील पदवी अभ्यासक्रम तसेच डेटा जर्नालिझम आणि योगशिक्षकांसंदर्भातील दोन पदव्युत्तर पदविका अभ्यासक्रमांचा समावेश आहे, अशी माहिती फर्ग्युसनचे प्राचार्य डॉ. श्याम मुंडे यांनी दिली.

विद्यार्थ्यांना नवीन संधी, अधिकाधिक रोजगाराभिमुख करण्याचे त्यामागे उद्दिष्ट आहे. तसेच डेटा जर्नालिझमवरील अभ्यासक्रमास कोणतीही पदवी पूर्ण केलेल्या विद्यार्थ्यास प्रवेश घेता येणार आहे. माध्यमांतील डेटा प्रोसेसिंगची वाढती गरज लक्षात घेऊन हा अभ्यासक्रम सुरु केला असल्याचे मुंडे यांनी सांगितले. पुरातत्त्वशास्त्र आणि योगाशिक्षकांसंदर्भातील अभ्यासक्रमांची रचनाही त्यांची वाढती मागणी आणि कुशल मनुष्यबळाची कमतरता लक्षात घेऊन केली असल्याचे उपप्राचार्य डॉ. राधिका जाधव यांनी सांगितले.
या चारही अभ्यासक्रमांची प्रवेशप्रक्रिया सुरु असून इच्छुक विद्यार्थ्यांनी महाविद्यालयाच्या संकेतस्थळाला भेट द्यावी किंवा महाविद्यालयात संपर्क साधावा, असे आवाहन डॉ. मुंडे यांनी केले आहे.