वाघोलीत वाहनाच्या धडकेत पादचारी महिलेचा मृत्यू

पुणे, ता. ८ : वाघोली परिसरात भरधाव वाहनाची धडक बसल्याने पादचारी महिलेचा मृत्यू झाला. अपघातानंतर वाहनचालक घटनास्थळावरून पसार झाला आहे. याप्रकरणी वाघोली पोलिसांनी अज्ञात चालकावर गुन्हा दाखल केला आहे.
विमल विजू आहेर (वय ५४, रा. पाटील वस्ती, केसनंद, ता. हवेली) असे मृत्युमुखी पडलेल्या महिलेचे नाव आहे. याबाबत त्यांचा मुलगा अक्षय आहेर (वय २५) यांनी वाघोली पोलिस ठाण्यात फिर्याद दिली आहे. पोलिसांनी दिलेल्या माहितीनुसार, सहा जुलै रोजी रात्री साडेआठ वाजण्याच्या सुमारास विमल आहेर या केसनंद परिसरातून पायी जात होत्या. त्यावेळी पाटील वस्तीतील समृद्धी डेअरीजवळ भरधाव वाहनाची त्यांना जोराची धडक बसली. अपघातानंतर संबंधित वाहनचालक घटनास्थळावरून पसार झाला.
याबाबत माहिती मिळताच पोलिस उपनिरीक्षक भाग्यश्री थोरात घटनास्थळी दाखल झाल्या. अपघातात गंभीर जखमी झालेल्या आहेर यांना तातडीने रुग्णालयात दाखल करण्यात आले. मात्र, उपचार सुरू होण्यापूर्वीच त्यांचा मृत्यू झाला. वाघोली पोलिसांनी चालकाचा शोध सुरू केला आहे.