देवदर्शनाच्या रांगेतून महिलेचे मंगळसूत्र लंपास

पुणे, ता. ८ : आषाढी एकादशीनिमित्त देवदर्शनासाठी रांगेत थांबलेल्या एका महिलेच्या पर्समधील ४० हजार रुपयांचे मंगळसूत्र चोरट्यांनी लांबवले. सिंहगड रस्त्यावरील विठ्ठलवाडी येथील मंदिर परिसरात ही घटना घडली.
याप्रकरणी नांदेडगाव येथील ४२ वर्षीय महिलेने सिंहगड रस्ता पोलिस ठाण्यात फिर्याद दिली आहे. त्यानुसार अज्ञात चोरट्यावर गुन्हा दाखल करण्यात आला आहे. फिर्यादी महिला आषाढी एकादशीच्या दिवशी रविवारी विठ्ठलवाडी येथील मंदिरात दर्शनासाठी रांगेत उभ्या होत्या. गर्दी असल्याने त्यांनी त्यांचे सोन्याचे मंगळसूत्र पर्समध्ये ठेवले होते. तरीही चोरट्याने भाविकांच्या गर्दीचा फायदा घेत महिलेच्या पर्समधून मंगळसूत्र चोरून नेले.