हडपसर रेल्वे स्थानक परिसरात बसस्थानकाच्या जागेची पाहणी

पुणे, ता. ८ : सार्वजनिक वाहतुकीत सुसूत्रता आणि सुलभता आणण्यासाठी ‘पीएमपी’च्या वतीने हडपसर रेल्वे स्थानक परिसरात प्रस्तावित बसस्थानक आणि वाहनतळासाठी जागेची पाहणी करण्यात आली. ‘पीएमपी’च्या अध्यक्ष व व्यवस्थापकीय संचालक दीपा मुधोळ-मुंडे यांनी मंगळवारी जागेला भेट देऊन या प्रकल्पाबाबत आढावा घेतला.

हडपसर रेल्वे स्थानक परिसरात रेल्वे प्रशासनाच्या नियोजनानुसार एक टर्मिनल विकसित केले जाणार आहे. याच टर्मिनलमध्ये ‘पीएमपी’चे स्वतंत्र बसस्थानक आणि पार्किंग सुविधा उभारण्याबाबत रेल्वे प्रशासनाकडे अधिकृत प्रस्ताव सादर करण्यात आला आहे. या पाहणी दरम्यान ‘पीएमपी’चे मुख्य वाहतूक व्यवस्थापक (ऑपरेशन) सतीश गव्हाणे, हडपसर डेपो व्यवस्थापक समीर आतार, रेल्वेचे मुख्य प्रकल्प व्यवस्थापक संजय लोहात्रे आदी अधिकारी उपस्थित होते.

या उपक्रमाविषयी बोलताना मुधोळ-मुंडे म्हणाल्या, ‘‘रेल्वे प्रवाशांसाठी अधिक सुविधा उपलब्ध करून देणे व ‘पीएमपी’ची बससेवा अधिक प्रभावी बनवणे हा मुख्य उद्देश आहे. प्रस्तावित टर्मिनलमध्ये जागा मिळाल्यानंतर पुणे शहरातील प्रमुख भागांपर्यंत थेट बससेवा उपलब्ध होईल. त्यामुळे रेल्वे आणि बससेवेचा समन्वय साधून प्रवाशांचा प्रवास अधिक सुलभ होईल.’’
---------------