‘पुणे दर्शन’, ‘पर्यटन बस’ला उत्स्फूर्त प्रतिसाद

पुणे, ता. ९ : ‘पीएमपी’तर्फे सुरू असलेल्या ‘पुणे दर्शन’ व ‘पर्यटन बस’ सेवेला गेल्या महिन्यात उत्स्फूर्त प्रतिसाद मिळाला आहे. जूनमध्ये ६ लाख ४८ हजार एवढे उत्पन्न प्राप्त झाले आहे.
प्रवाशांचा प्रवास आरामदायी, सुलभ व माफक दरात होण्याच्या दृष्टीने तसेच हौशी पर्यटक, भाविक-भक्त यांना धार्मिक व पर्यटन स्थळांना भेट देण्यासाठी पुणे महानगर परिवहन महामंडळाकडून ‘पुणे दर्शन’ व ‘पर्यटन बस’ सेवा प्रत्येक आठवड्याच्या शनिवार, रविवार, सुरू करण्यात आली होती. इतर दिवशी १५ ते २० प्रवाशांनी बुकिंग केल्यास कोणत्याही दिवशी बस सोडण्यात येते.
आषाढ व श्रावण महिन्यामध्ये पुणे महानगर परिवहन महामंडळाच्या पर्यटन बससेवेचा लाभ महिला, निसर्गप्रेमी, पर्यटक व भाविकांनी घ्यावा, असे आवाहन पुणे महानगर परिवहन महामंडळाचे मुख्य वाहतूक व्यवस्थापक सतीश गव्हाणे यांनी केले आहे.

महिना व उत्पन्न (रुपये)
- जानेवारी : ३ लाख ४७ हजार ५००
- फेब्रुवारी : २ लाख १७ हजार ५००
- मार्च : २ लाख ३६ हजार ५००
- एप्रिल : १ लाख ५६ हजार
- मे : ४ लाख ७५ हजार
- जून : ६ लाख ४८ हजार