आठ दिवसांत वाढला १६ टक्के पाणीसाठा

पुणे, ता. ८ : खडकवासला धरणसाखळीमध्ये गेल्या आठ दिवसांमध्ये १६.२९ टक्के म्हणजेच ४.७५ अब्ज घनफूट (टीएमसी) पाणीसाठा वाढला आहे. धरणसाखळीत जून महिन्यापासूनच चांगला पाऊस झाल्याने जुलै महिन्यात पुणेकरांच्या पिण्याच्या पाण्याचा प्रश्न सुटला आहे. सध्या धरणक्षेत्रात पावसाचा जोर ओसरला आहे.
शहराला पाणीपुरवठा करणाऱ्या चार प्रमुख धरणांमध्ये सध्या १९.६५ टीएमसी पाणीसाठा आहे. गेल्यावर्षी यादिवशी केवळ ६.८६ टीएमसी पाणीसाठा होता. मॉन्सूनने मे महिन्यातच हजेरी लावली, यानंतर मोठ्या प्रमाणात पाऊस झाल्याने गेल्यावर्षीपेक्षा १२ टीएमसी पाणीसाठा अधिक आहे. १ जूनपासून टेमघर धरणक्षेत्रात सर्वाधिक पावसाची नोंद झाली आहे, त्याठिकाणी एक हजार ५९५ मिलिमीटर पाऊस झाला. वरसगाव आणि पानशेत भागात एक हजार मिलीमीटरहून अधिक पाऊस झाला. परिणामी खडकवासला प्रकल्पातील खडकवासला, टेमघर, पानशेत आणि वरसगाव धरणांच्या पाणलोट क्षेत्रात धरणसाठ्यात मोठी वाढ झाली.
खडकवासला धरणसाखळी व्यतिरिक्त कळमोडी १०० टक्के तर नाझरे ९९.९८ टक्के भरले आहे. जिल्ह्यातील विसापूर, घोड, आंद्रा धरण ९० टक्क्यांहून अधिक भरले आहेत. चासकमान, वडज, पवना, गुंजवणी, वीर, कासारसाई, वडिवळे, चिल्हेवाडी, येडगाव धरणात ७० टक्क्यांपेक्षा अधिक साठा जमा झाला आहे. मुळशीमधील टाटांच्या वेगवेगळ्या धरणांमध्ये १५.१८ टीएमसी म्हणजेच ७५.३३ टक्के पाणीसाठा उपलब्ध असून भामा आसखेडमध्ये ५९.१७ टक्के पाणीसाठा जमा झाला आहे.

धरणाचे नाव --पाणीसाठा --टक्के
खडकवासला --१.१९-- ६०.२६
टेमघर--२.२०--५९.२७
वरसगाव--९.२०--७१.७२
पानशेत--७.०७--६६.३९
एकूण--१९.६५--६७.६५