डोळ्यांच्या लसीक शस्त्रक्रियेस अपात्र ठरलेल्यांवर यशस्वी उपचार

पुणे, ता. ८ : एशिया-पॅसिफिक ॲकॅडमी ऑफ ऑप्थाल्मोलॉजीच्या वार्षिक परिषदेत पुण्यातील एशियन आय हॉस्पिटलच्या संशोधनाला ‘बेस्ट रिसर्च पेपर अवॉर्ड’ मिळाला आहे. या संशोधनात लसीक शस्त्रक्रियेस अपात्र ठरलेल्या ३६१ रुग्णांवर यशस्वी रिफ्रॅक्टिव शस्त्रक्रिया करण्यात आली. या परिषदेत ३९ देशांतील १४ हजारांहून अधिक नेत्रतज्ज्ञांनी सहभाग घेतला.
डोळ्यांची लसीक शस्त्रक्रियेत लेसरच्या साहाय्याने कॉर्निया (डोळ्याचा पारदर्शक भाग) पातळ करून दृष्टिदोष (मायोपिया) दुरुस्त केला जातो. मात्र कॉर्निया खूप पातळ असणे, डोळ्यात कोरडेपणा असणे अशा कारणांमुळे अनेक रुग्णांना ही शस्त्रक्रिया करता येत नाही. या संशोधनाचे नेतृत्व करणारे एशियन आय हॉस्पिटलचे संचालक डॉ. वर्धमान कांकरिया म्हणाले, ही आजपर्यंतची जगातील सर्वात मोठी अभ्यास मालिका आहे. यामध्‍ये मायनस ६ डायॉप्टरपर्यंत मायोपिया असलेल्या व लसिकला अपात्र रुग्णांवर इम्प्लांटेबल कॉलमर लेन्स वापरून यशस्वी उपचार केले गेले. या तंत्रज्ञानात एक अतिशय पातळ, जैवसंगत लेन्स नैसर्गिक लेन्ससमोर प्रत्यारोपित केली जाते. ही केवळ पाच मिनिटांची, वेदनारहित शस्त्रक्रिया आहे. यामध्‍ये डॉ. शिरीन सोनवणे आणि डॉ. विराज पडवळ यांचाही मोलाचा सहभाग राहिला.