जिल्ह्यातील पर्यटनस्थळे एका ॲपवर

पुणे, ता. ९ : पुण्यात राहणार असो की बाहेर गावावरून पुण्यात फिरण्यासाठी आला असेल, तर पुणे शहरासह जिल्ह्यात किती पर्यटन स्थळे आहेत, ती कुठे आहेत, तेथे जाण्यासाठीच्या मार्गाबरोबरच कोठून आणि काय वाहन व्यवस्था आहे, तेथे जाण्यासाठीचा स्लॉट कोणते आहेत, प्रवेशासाठी किती शुल्क भरावे लागणार आहे, यांची इत्थंभूत माहिती लवकरच एका ॲपवर मिळणार आहे.
मावळ तालुकयातील कुंडमळा येथील पुलावर पर्यटकांची मोठ्या प्रमाणावर गर्दी झाल्याने तो पडला आणि चार पर्यटकांना आपला जीव गमवावा लागला. यापूर्वी अशा अनेक घटना पुणे जिल्ह्यात असलेल्या पर्यटनस्थळांवर घडल्या आहेत. या सर्व पार्श्‍वभूमीवर जिल्हा प्रशासनाने पर्यटनस्थळांवर सोई-सुविधा वाढविण्यांबरोबरच शुल्क आकारणे अशा विविध उपयोजना करण्यासाठी पर्यटन विकास आराखडा तयार केला आहेत. त्यामध्ये पर्यटकांच्या सोईसाठी ॲप विकसित करण्याचा निर्णय घेतला आहे.
पुणे जिल्ह्या निसर्गसंपन्न आहे. यात गड-किल्ले, धरणे, टेकड्या, गवताळ प्रदेश, लेण्या, ऐतिहासिक वारसास्थळे आहेत. तसेच या पर्यटनस्थळांना जोडणारे विविध मार्गदेखील आहे. त्यामुळे राज्यातील पर्यटकांबरोबरच परराज्य आणि परदेशातून पर्यटनासाठी पुणे जिल्ह्यात येणाऱ्यांची संख्या मोठी आहे. मात्र ही ठिकाणे कुठे आहेत, तेथे जाण्यासाठी वाहतूक व्यवस्था काय आणि कोठून सुविधा आहे, त्या ठिकाणी निवास आणि खाण्यापिण्याची काय सुविधा आहेत, यांची एकत्रित माहिती पर्यटकांना उपलब्ध होत नाही. अनेकदा त्यांची फसवणूक झाल्याचे प्रकारही उघडकीस आले आहेत. यामुळे जिल्हा प्रशासनाने हा निर्णय घेतला आहे. पुणे जिल्ह्यातील १३८ पर्यटन स्थळे आहेत. त्या सर्व ठिकाणांची माहिती, त्यांची वैशिष्ट, त्या ठिकाणी असलेल्या क्रीडा सुविधांसह सर्व माहिती देणारे ॲप विकसित करण्यात येणार आहे. त्यासाठीची प्रक्रिया जिल्हा प्रशासनाकडून सुरू करण्यात आली आहे.

पर्यटनस्थळांवर एकाचवेळी पर्यटकांची गर्दी उसळू नये, तेथे येणाऱ्या पर्यटकांना सर्व सोईसुविधा उपलब्ध व्हाव्यात, ही स्थळे कुठे आहेत, त्यासाठी मार्ग काय उपलब्ध आहे, अशा सर्व गोष्टींची माहिती पर्यटकांना एकाच ठिकाणी मिळावी यासाठी ॲप विकसित करण्याचा निर्णय घेण्यात आला आहे. पर्यटन विकास आराखडा या सर्व गोष्टींचा समावेश करण्यात आला आहे.
- जितेंद्र डुडी, जिल्हाधिकारी, पुणे

ही माहिती मिळणार
- पर्यटनस्थळे कुठे आहेत?
- तेथे जाण्यासाठी काय आणि कोणत्या सुविधा आहेत?
- पर्यटनस्थळाच्या परिसरात कोणकोणत्या सुविधा आहेत?
- पर्यटनस्थळाच्या ठिकाणी किती शुल्क आकारले जाणार आहे?
- ते ऑनलाइन भरण्याची सुविधा
- कोणकोणते स्लॉट आहेत?