शिवनेरीच्या मद्यधुंद चालकाला अटक

पुणे, ता. ११ ः स्वारगेटवरून ठाण्याला जाणाऱ्या ‘इ-शिवनेरी’चा चालक प्रवाशांनी भरलेल्या बसमध्येच दारू पीत बस चालविताना आढळून आला. बस वारजे येथे पोचल्यानंतर हा प्रकार उघडकीस आला. संबंधित चालक हा ठेकेदारांचा आहे. घटनेनंतर त्याला संबंधित कंपनीने बडतर्फ केले असून, एसटी प्रशासनदेखील त्याच्यावर दंडात्मक कारवाई करणार आहे. ही घटना शुक्रवारी सायंकाळी सहाच्या सुमारास वारजे परिसरात घडली. वारजे पोलिसांनी संबंधित चालकाला ताब्यात घेतले आहे.

शुक्रवारी सायंकाळी पाचच्या सुमारास ‘इ-शिवनेरी’ (एमएच-१२ एफ- ३९२४) ही ठाण्याच्या दिशेने निघाली. चालकाने धावत्या बसमध्येच मद्यप्राशन करण्यास सुरुवात केली. पावणेसहाच्या सुमारास वारजे परिसरात बस दाखल झाल्यानंतर दुचाकीस्वाराला पाठीमागून धडक दिली. घटनेनंतर दुचाकीस्वाराने ही बाब वाहतूक पोलिसांना कळविली. पोलिसांनी बस थांबवीत चालकाची चौकशी केली असता, चालक नशेत आढळून आला. त्याला पुढील कार्यवाहीसाठी वारजे पोलिसांनी ताब्यात घेतले आहे. घटनेमुळे प्रवाशांमध्ये भीतीचे वातावरण निर्माण झाले.
-------
दुसऱ्या चालकाची सोय
घटनेची माहिती मिळताच एसटी प्रशासनाने दुसऱ्या चालकाची सोय केली. त्यामुळे सुमारे दीड तासानंतर स्वारगेट -ठाणे बस मार्गस्थ झाली, पण ही घटना गंभीर असल्याने एसटी महामंडळाने कडक कारवाईचे संकेत दिले आहेत.
---------
संबंधित चालक हा भाडेतत्त्वावर काम करीत होता. तो ज्या कंपनीसाठी काम करीत होता त्या कंपनीने त्याला सेवेतून बडतर्फ केले आहे. एसटी प्रशासनदेखील आर्थिक दंड लावणार आहे.
- अरुण सिया, विभाग नियंत्रक, एसटी महामंडळ, पुणे विभाग