आयटी अभियंत्याची तीव्र पाठदुखीतून सुटका

पुणे, ता. १२ : अभियंता महिलेच्‍या मणक्यातील दुर्मीळ ट्यूमर (गाठ) ‘लॅमिनेक्टोमी ॲण्ड डीकॉम्प्रेशन ऑफ कॉर्ड’ या प्रक्रियेद्वारे नोबल रुग्णालयामधील शल्‍यविशारद डॉ. विशाल चौधरी व पथकाने काढली. ही शस्त्रक्रिया गुंतागुंतीची होती. सहा महिन्यांपासून तीव्र वेदना होत असलेल्या या महिलेची आता वेदनेतून सुटका झाली आहे.
डॉ. विशाल चौधरी म्हणाले, ही महिला तीव्र पाठीच्या वेदनांनी ग्रस्त होती. या वेदना कुठल्याही कामकाजानंतर नव्हे तर रात्री झोपेत किंवा कुठल्याही वेळी उद्‍भवत असायच्या. त्यानंतर त्यांनी इतर ठिकाणी औषधे व फिजिओथेरपीद्वारे उपचार घेण्याचा प्रयत्न केला, परंतु वेदना कमी झाल्या नाहीत. एमआरआय तपासणीमध्ये पाठीच्या मणक्याच्या मध्यभागी गाठ असल्याचे डॉक्‍टरांना आढळून आले.
ही जंतुपेशींपासून निर्माण होणारी एक दुर्मीळ गाठ आहे, जर याचे निदान वेळेवर केले गेले नाही तर पायातील ताकद कमी होऊ शकते आणि मणक्याचे कायमचे नुकसान होऊ शकते. त्यामुळे डॉक्‍टरांनी ‘लॅमिनेक्टोमी ॲण्ड डीकॉम्प्रेशन ऑफ कॉर्ड’ ही प्रक्रिया केली. यामध्‍ये पाठीच्या मणक्यावर किंवा नसांवर येणारा दाब कमी करण्यासाठी हाडाचा एक भाग (लॅमिना) काढून टाकण्यात येतो.