उत्पादन शुल्क विभागाकडून एक कोटीचा मुद्देमाल जप्त

पुणे, ता. १२ : राज्य उत्पादन शुल्क विभागाने केलेल्या कारवाईत सासवड गावाच्या हद्दीतील वीरफाट्याजवळ एक कोटी ३३ लाख ७८ हजार ४०० रुपये किमतीचा मुद्देमाल जप्त करण्यात आला, अशी माहिती राज्य उत्पादन शुल्क विभागाचे अधीक्षक अतुल कानडे यांनी दिली.
सासवड विभागाच्या भरारी पथकाने ही कारवाई केली. पथकाने सापळा रचून संशयित मोटारीची (एमएच ४९-एटी ३४७१) तपासणी केली असता, त्यामधील गोवा राज्यातील बनावट मद्याच्या ५७ हजार ७९२ बाटल्या जप्त करण्यात आल्या. वाहनचालकाविरुद्ध महाराष्ट्र दारूबंदी कायदा १९४९ तील कलमानुसार गुन्हा नोंदविण्यात आला असून, आरोपीस अटक करण्यात आली आहे. या कारवाईत उपअधीक्षक संतोष जगदाळे, निरीक्षक संभाजी बरगे यांनी सहभाग घेतला.