एफपीसीसाठी ऑनलाइन पुरवठासाखळी व्यवस्थापन

पुणे, ता. १३ : कृषी क्षेत्रातील शेतकरी उत्पादक कंपनी (एफपीसी) यशस्वी होण्यासाठी पुरवठासाखळी व्यवस्थापन अत्यंत महत्त्वाचे आहे. शेतकऱ्यांकडून उत्पादित होणारी कृषी उत्पादने वेळेवर, दर्जेदार व कमी खर्चात ग्राहकांपर्यंत पोहोचवण्यासाठी एफपीसीमध्ये योग्य नियोजन, प्रभावी अंमलबजावणी आणि आधुनिक डिजिटल तंत्रज्ञानाचा समावेश आवश्यक आहे. या ऑनलाइन प्रशिक्षणाचा उद्देश एफपीसी सदस्यांना पुरवठा साखळीची मूलतत्त्वे, खरेदी, साठवण आणि वितरण प्रक्रियेचे नियोजन, नोंद व्यवस्थापन व डिजिटल साधनांचा प्रभावी वापर याबाबत सखोल मार्गदर्शन देणे हा आहे. प्रशिक्षणाद्वारे एफपीसी अधिक कार्यक्षम, पारदर्शक आणि बाजाराशी सुसंगत कशी बनू शकते यावर भर दिला जाईल. तसेच बाजार संलग्नतेसाठी कृती आराखडा तयार करण्याची प्रक्रिया समजावून सांगितली जाईल. हे प्रशिक्षण एफपीसी सदस्य, व्यवस्थापक आणि कृषी क्षेत्राशी संबंधित स्वयंसेवी संस्थांसाठी उपयुक्त असून कृषी मूल्यसाखळीतील प्रत्येक टप्प्यावर निर्णयक्षमता वाढवण्यास मदत करेल. एफपीसीच्या सर्वांगीण विकासासाठी हे प्रशिक्षण महत्त्वपूर्ण ठरेल.
संपर्क : ९१५६०१००६०

सेंद्रिय खतनिर्मितीसह
वापराविषयी मार्गदर्शन
शेतजमिनीमध्ये रासायनिक खतांचा वापर मर्यादित करून सेंद्रिय खतांचा वापर वाढविल्यास जमिनीची उत्पादनक्षमता वाढते, मातीच्या कणांची रचना दाणेदार होते, जमिनीची जलधारणशक्ती वाढते, निचरा चांगला होतो व हवा खेळती राहते. तसेच रासायनिक खतांमुळे होणाऱ्या दुष्परिणामावर मात करता येते. रासायनिक खतांच्या किमती वाढल्यामुळे उत्पादन खर्चात वाढ होत आहे. म्हणून सेंद्रिय खते तयार करण्यास शिकवणारी व त्याचा वापर कसा करावा याबाबत मार्गदर्शन करणारी ऑनलाइन कार्यशाळा २१ जुलैला होणार आहे. यात नैसर्गिक शेतीमधील निविष्ठा, गोआधारित निविष्ठा, नैसर्गिक खत व्यवस्थापन, वनस्पतीपासून तयार करण्यात येणारी जैविक कीटकनाशके तयार करण्याची पद्धत, घरगुती बुरशीनाशके, चंद्र व सूर्याच्या कलेनुसार घेतले जाणारे सेंद्रिय उत्पादन व फवारण्यांचे नियोजन, बायोडायनामिक शेती पद्धती, सेंद्रिय शेतीमधील कीड नियंत्रणासाठी वापरल्या जाणाऱ्या सापळ्यांचा अभ्यास, परमा कल्चर शेती तंत्रज्ञान आदींबाबत मार्गदर्शन होईल. तसेच जीवामृत, घन जीवामृत, गार्बेज एन्झाइम, फर्मेंटेड फ्रूट ज्यूस, मुट्टई रस्सम, फिश अमिनो ॲसिड, सप्तधान्यांकुर अर्क, लॅक्टिक अॅसिड बॅक्टेरीया, गो कृपा अमृत, गांडूळखत, गांडूळपाणी, मासळीचे खत, हाडांचे खत, पेंडी, नॅडेप खत पद्धती, वर्मीफॉस, हिरवळीचे खत, झाडांच्या पानापासून व फुलांपासून खत, सिटी कंपोस्ट, मळीपासून खते, शेणापासून पीजीआर, तणापासून खतनिर्मिती आदींबाबत माहिती दिली जाईल.
संपर्क : ८४८४८११५४४