​‘सकाळ करंडक’ रंगणार नोव्हेंबरमध्ये

पुणे, ता. १३ : महाविद्यालयीन विद्यार्थी कलाकारांना हक्काचे व्यासपीठ देणारी आणि उगवत्या कलाकारांना नाट्य-चित्रपटसृष्टीकडे जाण्याचा मार्ग दाखवणारी स्पर्धा म्हणजे ‘सकाळ करंडक’ आंतरमहाविद्यालयीन एकांकिका स्पर्धा. संपूर्ण राज्यभरातील प्रतिभावान कलाकारांचा सहभाग असलेली ही स्पर्धा महाराष्ट्रातील एक मानाची स्पर्धा आहे. यंदाही नोव्हेंबरमध्ये ही स्पर्धा रंगणार आहे.

मराठी मातीला लाभलेल्या रंगभूमीच्या वैभवशाली परंपरेचा समृद्ध वारसा पुढच्या पिढीकडे सोपविण्याची जबाबदारी माध्यम समूह म्हणून आपली देखील आहे, या भूमिकेतून ‘सकाळ’ने या स्पर्धेचा प्रारंभ केला. अल्पावधीतच ही स्पर्धा लोकप्रिय झाली. एकापेक्षा एक सरस एकांकिकांचे सादरीकरण, तरुण कलाकारांची अफाट ऊर्जा आणि या कलाकारांना अनुभवी व ज्येष्ठ परीक्षकांकडून मिळणारे मार्गदर्शन, या वैशिष्ट्यांमुळे या स्पर्धेने वेगळी ओळख निर्माण केली आहे.

गतवर्षीप्रमाणे यंदाही राज्यभरातील विविध केंद्रांवर ही स्पर्धा रंगणार आहे. पुणे, मुंबई, छत्रपती संभाजीनगर, कोल्हापूर, नाशिक आणि नागपूर या सहा केंद्रांवर स्पर्धेची प्राथमिक फेरी होणार आहे. या विभागांमध्ये प्रथम क्रमांक पटकावलेल्या एकांकिकांची महाअंतिम फेरीसाठी निवड करण्यात येणार असून, त्यानंतर होणाऱ्या महाअंतिम फेरीतून स्पर्धेचा ‘महाविजेता’ निवडला जाणार आहे. ‘रांजेकर रियल्टी’ आणि ‘बुलडाणा अर्बन को. ऑप. क्रे. सोसायटी’ हे या स्पर्धेचे प्रायोजक आहेत.

स्पर्धेची वैशिष्ट्ये...
- विद्यार्थ्यांना भरघोस रकमेची पारितोषिके
- रंगभूमीवर कार्यरत असणाऱ्या दिग्गज कलाकारांकडून स्पर्धेचे परीक्षण
- कुठेही सादर न झालेली एकांकिका पाहण्याची संधी
- स्पर्धेपूर्वी अनुभवी व्यक्तींकडून मार्गदर्शन
- स्पर्धेतील आश्वासक कलाकारांना स्पर्धेनंतरही मार्गदर्शन

एकांकिका स्पर्धांमधूनच उत्तम कलाकार पुढे येत असतात. त्यांना केवळ योग्य व्यासपीठाची आणि योग्य दिशा दाखवण्याची गरज असते. ‘सकाळ करंडक’ ही महाराष्ट्रातील एक मानाची आणि महत्त्वाची स्पर्धा आहे. महाराष्ट्राच्या कानाकोपऱ्यातून आलेले तरुण कलाकार या स्पर्धेतून घडले आणि पुढे मालिका, चित्रपटांमध्ये यशस्वी झाले. यापुढेही असे कलाकार पुढे येतील, याची खात्री आहे.
- महेश मांजरेकर,
ज्येष्ठ लेखक-दिग्दर्शक-अभिनेते