हडपसर, वाकडेवाडीत अमली पदार्थ जप्त

पुणे, ता. १३ : गुन्हे शाखेच्या अमली पदार्थविरोधी पथकाने हडपसर आणि वाकडेवाडी परिसरात कारवाई करत पाच जणांना अटक केली. या कारवाईत सात लाख ८८ हजार रुपयांचे अमली पदार्थ जप्त करण्यात आले आहेत. पोलिस आयुक्त अमितेश कुमार यांच्या सूचनेनुसार शहरात अमली पदार्थविरोधी कारवाईची धडक मोहीम सुरू करण्यात आली आहे. मागील आठवड्यात बिबवेवाडी, कोंढवा आणि बुधवार पेठ परिसरात मेफेड्रोन आणि गांजा जप्त करण्यात आला होता.

हडपसर भागातील मांजरी परिसरात अफूच्या बोंडांचा चुरा विक्रीसाठी आलेल्या राजस्थानमधील दोघा संशयितांना अटक करण्यात आली. पोलिसांनी सापळा रचून राकेश अर्जुनदास रामावत (वय ४१) आणि ताराचंद सीताराम जहाँगीर (वय २६, दोघे रा. उरुळी कांचन, मूळ रा. राजस्थान) यांना अटक केली. त्यांच्याकडून साडेतीन किलो अफूच्या बोंडांचा चुरा जप्त करण्यात आला असून, त्याची किंमत सुमारे दोन लाख १५ हजार रुपये आहे.

दरम्यान, मुंबई-पुणे रस्त्यावरील वाकडेवाडी परिसरात गांजाची विक्री करण्यासाठी आलेल्या तिघांना अटक करण्यात आली. अटक केलेल्यांमध्ये भागवत शिवाजी मंडलिक (वय २६, रा. विमल गार्डनजवळ, रहाटणी), मुसीम सलीम शेख (वय २६), आणि महेश नारायण कळसे (वय २४, दोघे रा. शिरूर कासार, जि. बीड) यांचा समावेश आहे. त्यांच्याकडून २१ किलो गांजा जप्त करण्यात आला असून, त्याची किंमत सुमारे पाच लाख ७२ हजार रुपये आहे.

गुन्हे शाखेचे अतिरिक्त पोलिस आयुक्त पंकज देशमुख, पोलिस उपायुक्त निखिल पिंगळे, सहाय्यक आयुक्त राजेंद्र मुळीक यांच्या मार्गदर्शनाखाली पोलिस निरीक्षक सुदर्शन गायकवाड, सहाय्यक निरीक्षक नितीनकुमार नाईक, पोलिस उपनिरीक्षक अस्मिता लाड आणि त्यांच्या सहकाऱ्यांनी ही कारवाई केली. या मोहिमेत पोलिस अंमलदार प्रफुल्ल मोरे, नितीन जगदाळे, योगेश मांढरे, संदीप जाधव, उदय राक्षे, प्रशांत बोमादंडी, चेतन गायकवाड, मयूर सूर्यवंशी, साहिल शेख, रवींद्र रोकडे, आझाद पाटील, शेखर खराडे, दिशा खेवलकर यांनी सहभाग घेतला.