सवलतीच्या दरात १५ ऑगस्टपर्यंत पाहा शिवसृष्टी

पुणे, ता. १४ : गेल्या दोन महिन्यांत शिवसृष्टी प्रकल्पाला मिळालेल्या प्रतिसादानंतर तिकीटदरातील सवलत आता १५ ऑगस्टपर्यंत वाढविण्यात आली आहे, अशी माहिती महाराजा शिवछत्रपती प्रतिष्ठानचे विश्वस्त आणि शिवसृष्टी प्रकल्पाचे अध्यक्ष जगदीश कदम यांनी दिली आहे.
कदम म्हणाले, ‘‘महाराजा शिवछत्रपती प्रतिष्ठानातर्फे साकारलेला शिवसृष्टी हा प्रकल्प जास्तीत जास्त नागरिकांपर्यंत पोहोचावा या हेतूने अभय भुतडा फाउंडेशनतर्फे प्रतिष्ठानला ५१ लाखांचा निधी सुपूर्त केला. या ऐतिहासिक प्रेरणास्थळाला अधिकाधिक लोकांपर्यंत पोहोचविण्यासाठी १५ मे ते १५ जुलै या कालावधीत नागरिकांकडून ५० रुपये प्रवेशशुल्क घेण्यात आले. या दरम्यान तब्बल एक लाख नागरिकांनी प्रकल्पाला भेट देत शिवछत्रपतींचा देदीप्यमान काळ, त्यांनी पाहिलेले स्वराज्याचे स्वप्न अनुभवले. त्यामुळे सवलतीचा काळ वाढवून प्रतिव्यक्ती ५० रुपये याच दरामध्ये नागरिकांना शिवसृष्टीला भेट देता येणार आहे. शिवभक्त, इतिहासप्रेमी, विद्यार्थी, कुटुंबे आणि ज्येष्ठ नागरिक सर्वांनीच याचा लाभ घ्यावा, असे आवाहन या वेळी कदम यांनी केले.