पाच तासांच्या प्रवासाला तब्बल नऊ तास प्रवाशांना मनस्ताप ः विनाथांबा शिवशाही बसचा ‘थांबत थांबत’ प्रवास

पुणे, ता. १४ ः ‘‘मी पुण्याहून छत्रपती संभाजीनगरला जाण्यासाठी दुपारी एक वाजता निघणाऱ्या ‘शिवशाही’ बसचे तिकीट काढले. ‘विना वाहक, विना थांबा’ बस असल्याने आपण वेळेत पोहोचू, असे वाटले. प्रत्यक्षात मात्र मार्गावरील गावांमध्ये एसटी स्थानकावर गाडी नेत प्रवासी भरण्यात आले. त्यामुळे पाच तासांचा प्रवास तब्बल नऊ तासांनी संपला. ‘विना थांबा’ म्हटलेल्या या ‘शिवशाही’ बसपेक्षा सगळीकडे थांबा असलेली ‘लालपरी’ कमी वेळेत पोचली,’’ असा अनुभव पौर्णिमा पाटील या सांगत होत्या.
हा अनुभव केवळ एका प्रवाशाचा नाही, तर एसटीच्या बहुतांश मार्गावरील अनेक प्रवाशांचा आहे. महाराष्ट्र राज्य मार्ग परिवहन महामंडळाने (एसटी) काही मार्गांवर ‘विना वाहक, विना थांबा’ बससेवा सुरू केली आहे. मात्र, प्रत्यक्षात नियमाचे पालन होत नसल्याने अनेक थांबे घेत या बस पुढे जातात. त्यामुळे वेळ वाचवण्याच्या अपेक्षेने या बसमधून प्रवास करणाऱ्या प्रवाशांना मात्र नाहक मनस्ताप सहन करावा लागतो.
पुणे-मुंबई, पुणे-नाशिक, पुणे-सोलापूर, पुणे-छत्रपती संभाजीनगर, पुणे-कोल्हापूर, पुणे-सातारा अशा अनेक मार्गांवर एसटीच्या ‘विना वाहक, विना थांबा’ बसगाड्या धावतात. एका महानगरातून थेट दुसऱ्या महानगरात जाऊ इच्छिणाऱ्या प्रवाशांची संख्या मोठी असते. अशावेळी प्रत्येक गावात थांबणाऱ्या बसपेक्षा कोठेही थांबा नसणाऱ्या बसमुळे प्रवाशांचा वेळ वाचेल, या उद्देशातून ‘विना वाहक, विना थांबा’ या बसगाड्या सुरू करण्यात आल्या.
प्रत्यक्षात अनेकदा प्रवासी संख्या कमी असेल, तर या बसगाड्या मार्गावरील गावांमध्ये थांबतात. तेथील बस स्थानकावर प्रवासी भरून, त्यांचे तिकीट काढून पुढे निघण्यास किमान अर्धा तास वेळ जातो. मात्र असे करत बसला नियोजित ठिकाणी पोहोचण्यास सहजपणे दोन-तीन तासांचा विलंब होतो. काही वेळा यासाठी गावाबाहेरून जाणारा बाह्यवळण मार्ग टाळून गावातील बस स्थानकावर बस नेली जाते.
----
‘विना वाहक, विना थांबा’ ही बस कोठेही थांबणे अपेक्षित नाही. जर चालकाकडून असा प्रकार घडत असेल तर त्याची दखल घेऊन नोटीस बजावली जाईल.
अरुण सिया, विभाग नियंत्रक, एसटी महामंडळ, पुणे