बिबवेवाडीत चाकू हल्ल्यात भावाचा मृत्यू

पुणे, ता. १४ : बिबवेवाडी परिसरात एकाने आपल्या लहान भावाचा चाकूने वार करून खून केल्याची धक्कादायक घटना घडली. ‘सतत दारू पितो, कामधंदा करत नाही आणि त्रास देतो’, या कारणावरून मोठ्या भावाने लहान भावावर चाकू हल्ला केला. या हल्ल्यात गंभीर जखमी झालेल्या तरुणाचा मृत्यू झाला आहे.
ही घटना बिबवेवाडी येथील अप्पर सुपर गणेशनगरमधील लेन क्रमांक तीनमध्ये शनिवारी रात्री घडली. प्रवीण ऊर्फ ऋतिक दत्तात्रेय नवले (रा. अप्पर सुपर गणेशनगर) हा चाकू हल्ल्यात गंभीर जखमी झाला. त्याला तातडीने ससून रुग्णालयात उपचारासाठी दाखल करण्यात आले होते. मात्र, डॉक्टरांनी त्याला मृत घोषित केले. या प्रकरणी आरोपी अनिकेत दत्तात्रेय नवले (वय २६, रा. अप्पर सुपर गणेशनगर) याला बिबवेवाडी पोलिसांनी अटक केली आहे. याबाबत वरिष्ठ पोलिस निरीक्षक अश्विनी सातपुते म्हणाल्या, ‘‘कुटुंबातील वादातून दोन भावांमध्ये वाद झाला. मोठ्या भावाने चाकूने वार करत लहान भावाचा खून केला. आरोपीस अटक करण्यात आली आहे.’’